بٹگرام، سینی ٹیشن اپ سکیلنگ پراجیکٹ ہیومن اپیل تنظیم کے تحت ضلعی سطح پر ایک روزہ ورکشاپ

جمعہ 20 جون 2025 15:48

بٹگرام (اُردو پوائنٹ اخبارتازہ ترین - اے پی پی۔ 20 جون2025ء) سینی ٹیشن اپ سکیلنگ پراجیکٹ ہیومن اپیل تنظیم کے تحت ضلعی سطح پر ایک روزہ ورکشاپ کا انعقاد کیا گیا۔ ورکشاپ میں تمام متعلقہ سٹیک ہولڈر ز بشمول ضلعی انتظامیہ، ڈسٹرکٹ ہیلتھ افسیر ڈاکٹر ذاکر خان ۔ ایکسیئن پبلک ہیلتھ بٹگرام ،ایجوکیشن ڈیپارٹمنٹ سے شاہ خالد اور احسان ،ڈسٹرکٹ خطیب مولانا شاہد خان، تحصیل خطیب محمد ایاز، واش منیجر ہیومن اپیل پاکستان بلال احمد، سوشل میڈیا ایکٹیوسٹ ، ویلج کونسل کے نمائندے، ویلج واش کمیٹی اور ویمن سپورٹ گروپ کے نمائندے، تحصیل مونسپل آفیسر بٹگرام، نیوٹریشن سپشلسٹ ڈاکٹر حسین خان اور لوکل گورنمنٹ کے نمائندوں نے شرکت کی۔

اس ورکشاپ کا مقصد شرکاء کو اس پراجیکٹ کےتحت حاصل ہونے والے اہداف کے بارے میں بتانا اور سماجی رویوں میں مثبت تبدیلی کے مو ضوع پر سیکٹر ایکسپڑٹ نے تفصیلی سیشن دئیے ۔

(جاری ہے)

شرکاء نے خبردار کیا کہ انسانی فضلہ جات کی وجہ سے دوسرے لوگ متاثر ہو رہے ہیں چونکہ پانی کی ندی میں گھٹر لائن چھوڑنے سے نہ صرف پانی آلودہ ہو رہا ہے بلکہ اس سے آبی حیات کو بھی نقصان پہنچ رہا ہے۔

ضلع کے تمام شراکت داروں علمائےکرام، مالکان، کمیونٹی ،حکومت اور سول سوسائٹی کی ذمہ داری ہے کہ لوگوں کو پابند کریں کہ وہ لیٹرین کے ساتھ سیپٹک ٹینک اور سوکیج پٹ بنائیں ، انسانی فضلہ جات کے نقصانات سے خود بھی محفوظ رہیں اور دوسروں کو بھی محفوظ رکھنے میں اور مثبت سماجی رویوں میں تبدیلی کے لیے اپنا کردار ادا کریں۔ تقریب سے خطاب کرتے ہوئے ایڈیشنل ڈپٹی کمشنر جنرل بٹگرام ضیاء الرحمن نے ہیومن اپیل تنظیم کے تعاون سےضلع کے دور دراز علاقوں میں سینی ٹیشن کے کامیاب پراجیکٹس ،عوامی ٹوائلٹ کی تعمیر اور پینے کے پانی کی ٹیسٹنگ لیبارٹری کے قیام کے ساتھ لوگوں میں حفظان صحت سے متعلق شعور اجاگر کرنے میں فعال کردار ادا کرنے ہر پوری ٹیم کو مبارکباد پیش کی ۔

انہوں نے کہا کہ سینی ٹیشن کے حوالے سے ہیومن اپیل نے ضلعی انتظامیہ کا اہم شراکت دار کے حیثیت سے ساتھ دیا ہے اور توقع ظاہر کی ہیومن اپیل مستقبل میں بھی بٹگرام کے عوام کیلئے حفظان صحت کی بہتر سہولیات فراہم کرنے کیلئے مزید پراجیکٹس متعارف کرانے میں فعال کردار ادا کرے گا۔