ویپ اورالیکٹرک سگریٹ پر پابندی کیخلاف دائر درخواست (کل )سماعت کیلئے مقرر

ہفتہ 21 جون 2025 16:55

لاہور (اُردو پوائنٹ اخبارتازہ ترین - این این آئی۔ 21 جون2025ء) لاہور ہائیکورٹ نے ویپ اور الیکٹرک سگریٹ پر پابندی کے خلاف دائر درخواست کل (پیر )23جون کو سماعت کے لئیمقرر کردی ، عدالت نے چیف سیکرٹری سمیت دیگر فریقین سے جواب طلب کررکھا ہے ۔

(جاری ہے)

جسٹس انوار حسین،ویپ مال سمیت 74ڈیلرز کی درخواست پر سماعت کریں گے، پنجاب حکومت کی جانب سے اسسٹنٹ ایڈووکیٹ جنرل عمران خان پیش ہوں گے ، درخواستگزاروں کے وکلا کی جانب سے موقف اختیار کیا گیا کہ وفاقی حکومت ویپ اور الیکٹرک سگریٹ درآمد کرنے کی اجازت دیتی ہے،کسٹمز ڈیوٹی ادا کرکے کاروبار کررہے ہیں ، آئین ہر شہری کو کاروبار کرنے کا حق دیتا ہے، پنجاب حکومت نے ویپ اور الیکٹرانک سگریٹ پر پابندی عائد کردی ہے، ویپ اور الیکٹرانک سگریٹوں کی دکانوں کو سیل کردیا گیا ہے، درخواست گزاروں نے استدعا کی کہ عدالت ویپ اور الیکٹرک سگریٹ کی دکانوں کو سیل کر نے ، کاروبار پر پابندی کا اقدام کالعدم قرار دے۔