وزیر اعلیٰ پنجاب کی جانب سے ویسٹ مینجمنٹ کمپنی کے افسران و ملازمین میں بونس پرائز کی تقسیم

اتوار 22 جون 2025 13:40

سرگودھا (اُردو پوائنٹ اخبارتازہ ترین - اے پی پی۔ 22 جون2025ء) وزیر اعلیٰ پنجاب کی خصوصی ہدایات پر عیدالاضحی کے موقع پر مثالی صفائی کےانتظامات کرنےوالے سرگودھا ویسٹ مینجمنٹ کمپنی کے ورکرز، مانیٹرنگ افسران اور دفتری عملے میں بونس پرائز تقسیم کرنے کی تقریبات ڈویژن بھر میں جاری ہیں۔ اس سلسلے میں تحصیل سطح پر تقریبات کا انعقاد کیا جا رہا ہے جن میں متعلقہ اضلاع کے ڈپٹی کمشنرز، اسسٹنٹ کمشنرز، دیگر انتظامی افسران اور معزز پارلیمنٹرین شریک ہیں۔

چیف ایگزیکٹو آفیسر سرگودہا ویسٹ مینجمنٹ کمپنی رانا شاہد عمران کے مطابق کے 8 ہزار سے زائد ورکرز کو وزیراعلیٰ پنجاب کی جانب سے 10 ہزار روپے فی کس بونس دیا جا رہا ہے۔ سرگودہا میں اس سلسلے کی مرکزی تقریب آج شام سات بجے ایک مقامی شادی ہال میں منعقد ہوگی۔

(جاری ہے)

جس میں کمشنر سرگودہا ڈویژن جہانزیب اعوان ورکرز میں بونس تقسیم کریں گے۔ رانا شاہد عمران نے مزید بتایا کہ گرمی کے شدید موسم کے پیش نظر تقریبات کا انعقاد ائیر کنڈیشنڈ ہالز میں کیا جا رہا ہے، تاکہ ورکرز کو بہترین ماحول میں خراجِ تحسین پیش کیا جا سکے۔

ان تقریبات میں بونس کے ساتھ شرکاءکو پرتکلف کھانے بھی پیش کیے جا رہے ہیں۔انہوں نے کہا کہ صفائی کے محاذ پر فرنٹ لائن پر کام کرنے والے ورکرز کی خدمات لائقِ تحسین ہیں اور حکومت پنجاب ان کی حوصلہ افزائی کے لیے عملی اقدامات کر رہی ہے۔