وزیر اعلیٰ بلوچستان کاخیبر پختونخوا میں حالیہ بارشوں اور سیلاب سےقیمتی انسانی جانوں کے ضیاع پر رنج و غم کا اظہار

جمعہ 15 اگست 2025 22:03

کوئٹہ (اُردو پوائنٹ اخبارتازہ ترین - اے پی پی۔ 15 اگست2025ء) وزیر اعلیٰ بلوچستان میر سرفراز بگٹی نے خیبر پختونخوا میں حالیہ بارشوں اور سیلاب سے ہونے والی تباہی خصوصاً قیمتی انسانی جانوں کے ضیاع پر گہرے رنج و غم کا اظہار کیا ہے وزیر اعلیٰ نے کہا کہ یہ قدرتی آفات انسان کے اختیار سے باہر ہیں لیکن ان کے دکھ اور اثرات ہر دل کو مغموم کر دیتے ہیں انہوں نے کہا کہ یہ کڑا وقت ہے اور ایسی ہی صورتحال سے 2022 میں سندھ اور بلوچستان کے عوام بھی گزر چکے ہیں اس لیے ہم بخوبی جانتے ہیں کہ ایسے سانحات کس قدر تکلیف دہ اور آزمائش بھرے ہوتے ہیں، انہوں نے کہا کہ اس سانحہ نے نہ صرف متاثرہ خاندانوں بلکہ پوری قوم کو افسردہ کر دیا ہے اور بلوچستان کے عوام اپنے خیبر پختونخوا کے بھائیوں اور بہنوں کے ساتھ غم کی اس گھڑی میں بھرپور یکجہتی کا اظہار کرتے ہیں وزیر اعلیٰ نے کہا کہ سیلاب سے متاثرہ ہر فرد کی تکلیف ہمارے لیے مشترکہ درد کی مانند ہے اور دعا ہے کہ اللہ تعالیٰ جاں بحق افراد کے درجات بلند فرمائے ان کے لواحقین کو صبرِ جمیل عطا کرے اور زخمیوں کو جلد صحت یاب کرے، وزیر اعلیٰ بلوچستان نے ہیلی کاپٹر حاد ثہ میں شہید ہونے والے افراد کے لیے بھی دعا کی اور اس المناک حاد ثہ پر گہرے افسوس کا اظہار کیا۔