ایران پر امریکہ اور اسرائیل کے حالیہ حملے بین الاقوامی قوانین کی سنگین خلاف ورزی ہیں،گورنر بلوچستان

اتوار 22 جون 2025 22:20

کوئٹہ (اُردو پوائنٹ اخبارتازہ ترین - اے پی پی۔ 22 جون2025ء) گورنربلوچستان جعفرخان مندوخیل نے کہا ہے کہ ایران پر امریکہ اور اسرائیل کے حالیہ حملے بین الاقوامی قوانین کی سنگین خلاف ورزی ہیں، ایران کو اقوام متحدہ کے چارٹر کے آرٹیکل 51 کے تحت اپنے دفاع کا پورا حق حاصل ہےجو کہ اس کے شہریوں کے حق و حفاظت کی ضمانت دیتا ہے۔اتوار کو جاری کردہ بیان کے مطابق گورنر نے ایران کے خلاف اسرائیل کی جارحیت کو ایران کی خودمختاری اور علاقائی سالمیت کی کھلی خلاف ورزی قراردیتے ہوئے اس کی بھرپور مذمت کی۔

گورنر جعفر خان مندوخیل نے اس بات پر تشویش کا اظہار کیا کہ کسی بھی ملک کی خودمختاری کے خلاف اس طرح کے غیرذمہ دارانہ رویوں اور جارحانہ ذہنیت سے عالمی امن و استحکام کو خطرات لاحق ہو سکتے ہیں۔

(جاری ہے)

گورنر نے مشکل کی اس گھڑی میں برادر ہمسایہ ملک ایران کی حکومت اور عوام کے ساتھ یکجہتی کا اعادہ کیا۔ انہوں نے ایرانی شہروں پر حملوں کی شدید مذمت کرتے ہوئے انہیں بین الاقوامی قانون کے بنیادی اصولوں کی بےتوقیری قرار دیا۔

گورنر بلوچستان نے حالیہ حملوں کے نتیجے میں ہونے والے جانی و مالی نقصانات پر گہرے دکھ کا اظہار کیا اور امن کی ضرورت پر زور دیا۔ انہوں نے اس بات پر زور دیا کہ جنگ کبھی بھی مسائل کا حل نہیں ہوتی اور امید ظاہر کی کہ حالات جلد بہتر ہوں گے جس سے پرامن حل کی راہ ہموار ہوگی۔انہوں نے کہا کہ تنازعات کو پرامن طریقے سے حل کرنے کیلئے سفارتی کوششوں کی اشد ضرورت ہے۔