ی*ایران کے خلاف امریکا کے بڑے پیمانے پر جوابی حملے کی نئی تفصیلات منظر عام پر آ گئی

/ امریکی فوج نے ایرانی جوہری تنصیبات پر بمباری کے لیے 125 سے زیادہ طیارے، اسٹیلتھ بی-2 بمبار اور زیرِ آب آبدوزوں سے داغے گئے ٹوما ہاک میزائل استعمال کیے

پیر 23 جون 2025 04:05

v تہران، واشنگٹن(اُردو پوائنٹ اخبارتازہ ترین - آن لائن۔ 23 جون2025ء)ایران کے خلاف امریکا کے بڑے پیمانے پر جوابی حملے کی نئی تفصیلات منظر عام پر آ گئی ہیں، جن میں انکشاف ہوا ہے کہ امریکی فوج نے ایرانی جوہری تنصیبات پر بمباری کے لیے 125 سے زیادہ طیارے، اسٹیلتھ بی-2 بمبار اور زیرِ آب آبدوزوں سے داغے گئے ٹوما ہاک میزائل استعمال کیے۔واشنگٹن پوسٹ کی ایک رپورٹ کے مطابق اس حملے کے آپریشن کو ’مڈنائٹ ہیمر‘ کا کوڈ نام دیا گیا تھا، جس کا مقصد ایران کے جوہری پروگرام کو ناقابلِ تلافی نقصان پہنچانا تھا۔

امریکی چیئرمین جوائنٹ چیفس آف اسٹاف جنرل ڈین کین نے ایک نیوز کانفرنس میں بتایا کہ اس پیچیدہ حملے میں سات B-2 اسپِرٹ بمبار طیاروں نے حصہ لیا، جنہوں نے ایران میں مخصوص اہداف پر رات 2 بجے 30 ہزار پاؤنڈ وزنی بنکر بسٹر بم برسائے۔

(جاری ہے)

جنرل کین کے مطابق یہ طیارے امریکا کے وائٹ مین ایئر فورس بیس (میسوری) سے روانہ ہوئے اور 18 گھنٹے کی طویل پرواز کے بعد ایران کے اوپر پہنچے، اس دوران بحراوقیانوس کے دونوں کناروں پر موجود کئی ٹینکر طیاروں نے فضائی ایندھن کی فراہمی کو یقینی بنایا۔

حکام کے مطابق طیاروں کو امریکی لڑاکا طیاروں کی مکمل فضائی حفاظت حاصل تھی، اور حملے کے دوران کسی بھی ایرانی فائر یا مزاحمت کی کوئی اطلاع موصول نہیں ہوئی۔جنرل کین نے مزید بتایا کہ بمباری سے کچھ دیر قبل امریکی آبدوزوں نے ایران کے مختلف علاقوں میں اہداف پر دو درجن سے زیادہ ٹوم ہاک کروز میزائل فائر کیے، جنہوں نے ہدف کو کامیابی سے نشانہ بنایا۔

پریس کانفرنس کے دوران امریکی وزیر دفاع پیٹ ہیگسیٹھ بھی موجود تھے، جنہوں نے پینٹاگون میں اپنی تعیناتی کے بعد پہلی باضابطہ پریس بریفنگ دی۔ انہوں نے اس کارروائی کو درست اور فیصلہ کن قرار دیتے ہوئے کہاکہ ہم نے ایرانی جوہری پروگرام کو شدید نقصان پہنچایا ہے۔ یہ ایک محتاط اور منصوبہ بند کارروائی تھی جو امریکی سلامتی کے تحفظ کے لیے ضروری تھی۔