صوبائی وزیر صحت خواجہ سلمان رفیق کی سربراہی میں صوبائی کابینہ کمیٹی برائے امن و امان کا ڈیرہ غازی خان کا دورہ

ڈیرہ غازی خان (اُردو پوائنٹ اخبارتازہ ترین - اے پی پی۔ 23 جون2025ء) وزیر اعلیٰ پنجاب کے خصوصی احکامات پر صوبائی وزیر صحت خواجہ سلمان رفیق کی سربراہی میں صوبائی کابینہ کمیٹی برائے امن و امان نے ڈیرہ غازی خان کا دورہ کیا اور کمشنر آفس میں اجلاس کی صدارت کی۔ سیکرٹری داخلہ پنجاب ڈاکٹر احمد جاوید قاضی، ایڈیشنل آئی جی چوہدری سلطان، ایڈیشنل آئی جی جنوبی پنجاب محمد کامران خان، ایڈیشنل آئی جی سپیشل برانچ راؤ عبدالکریم ، ڈی آئی جی سی ٹی ڈی عثمان گوندل اور دیگر موجود تھے۔

اس موقع پر آر پی او ڈی جی خان کیپٹن (ر) سجاد حسن خان اور کمشنر اشفاق احمد چوہدری نے انتظامات کے بارے بریفنگ دی۔ اجلاس میں بتایا گیا کہ ڈی جی خان ڈویژن میں یکم سے دس محرم الحرام تک تمام 1360 جلوس اور 4658 مجالس کے انتظامات مکمل کرلئے گئے ہیں ۔

(جاری ہے)

203 مقررین و ذاکرین کی ضلع بندی اور 95 کی زباں بندی کے احکامات جاری کئے گئے ہیں ،ڈی جی خان ڈویژن میں موجود 5027 مساجد، 581 امام بارگاہوں اور 2484 مدارس کی بھی سکیورٹی ترتیب دی گئی ہے۔

محرم الحرام کے دوران پولیس کی امداد کیلئے پاک آرمی کی 8 اور رینجرز کی 9 کمپنیوں کی خدمات طلب کی گئی ہیں۔اجلاس میں ڈی جی خان، لیہ، مظفرگڑھ، کوٹ ادو اور راجن پور سے ڈپٹی کمشنرز اور ڈی پی اوز نے بھی بریفنگ دی۔ ڈویژنل،ضلعی افسران اور متعلقہ محکموں کے سربراہان اجلاس میں موجود تھے۔ صوبائی وزیر و چیئرمین کابینہ کمیٹی خواجہ سلمان رفیق نے اجلاس کی صدارت کرتے ہوئے کہا کہ محرم الحرام کے دوران سکیورٹی کے غیر معمولی انتظامات یقینی بنائے جا رہےہیں۔

تمام مکاتب فکر محرم الحرام مذہبی عقیدت و احترام اور پُرامن انداز میں گزارنے کیلئے اپنا کردار ادا کریں۔محکمہ داخلہ کی جانب سے جاری کردہ ایس او پیز پر من و عن عملدرآمد یقینی بنایا جائے،پنجاب بھر میں امن کمیٹیاں متحرک اور مثبت کردار ادا کر رہی ہیں۔ سیکرٹری داخلہ پنجاب ڈاکٹر احمد جاوید قاضی نے کہا کہ محکمہ داخلہ پنجاب میں قائم مرکزی کنٹرول روم صوبہ بھر سے رپوٹ لے رہا ہے۔

جلوس اور مجالس کے اختتام تک ڈیوٹی پر تعینات تمام عملہ موجود رہے۔ ایڈیشنل آئی جی چوہدری سلطان کا کہنا تھا کہ محرم الحرام سے قبل تمام تر سکیورٹی اقدامات کو حتی شکل دی جائے اور فرقہ وارانہ مواد کے خلاف سخت قانونی کاروائی عمل میں لائی جائے۔اجلاس کے بعد کابینہ کمیٹی نے ڈویژنل امن کمیٹی اور تمام مکاتب فکر کے علماء و مشائخ سے ملاقات بھی کی۔ علما نے محرم الحرام کے انتظامات پر اطمینان کا اظہار کیا اور کہا کہ ڈیرہ غازی خان ڈویژن میں پُرامن ماحول کے قیام کے لیے تمام سٹیک ہولڈرز یکسو ہیں۔