آل پاکستان چیف منسٹر فٹبال ٹورنامنٹ کا آغاز یکم جولائی کو ہوگا،صوبائی مشیر برائے کھیل و امور نوجوانان مینا مجید بلوچ

پیر 23 جون 2025 16:17

کوئٹہ (اُردو پوائنٹ اخبارتازہ ترین - اے پی پی۔ 23 جون2025ء) صوبائی مشیر برائے کھیل و امور نوجوانان مینا مجید بلوچ نے کہا کہ یکم جولائی سے آل پاکستان چیف منسٹر فٹبال ٹورنامنٹ کا آغاز کیا جا رہا ہے جو صوبے کی کھیلوں کی تاریخ میں ایک اہم سنگ میل ثابت ہوگا ۔ان خیالات کا اظہار انہوں نے سیکرٹری سپورٹس درا بلوچ کے ہمراہ نیوز کانفرنس کرتے ہوئے کیا۔

محترمہ مینا مجید بلوچ نے کہا کہ یہ ٹورنامنٹ مرحلہ وار ہوگا، پہلے ڈسٹرکٹ اور پھر ڈویژن کی سطح پر مقابلے منعقد کیے جائیں گے، جس کے بعد صوبائی سطح پر فائنل رائونڈ کھیلا جائے گا۔ اس ٹورنامنٹ کی فاتح ٹیم کو 25 لاکھ روپے کا بڑا انعام دیا جائے گا، جس سے کھلاڑیوں کی حوصلہ افزائی ہوگی اور بہترین کارکردگی کا مظاہرہ کرنے کا موقع ملے گا۔

(جاری ہے)

صوبائی مشیر برائے کھیل و امور نوجوانان مینا مجید بلوچ نے کہا کہ خواتین کے لئے کھیلوں کے فروغ پر بھی خصوصی توجہ دی جا رہی ہے ۔

چیف منسٹر ویمن ہاکی ٹورنامنٹ کا بھی آغاز جلدکیا جا ئے گا ،اس اقدام کا مقصد خواتین کھلاڑیوں کو پلیٹ فارم فراہم کرنا اور انہیں کھیلوں میں حصہ لینے کے لیے ترغیب دینا ہے ۔انہوں نے کہا کہ 33 مختلف کھیلوں کو شامل کیا جائے گا۔ یہ گیمز بلوچستان بھر کے نوجوانوں کو اپنی صلاحیتیں دکھانے اور مختلف کھیلوں میں حصہ لینے کا موقع فراہم کرے گا۔سپورٹس ہی نوجوانوں کی ترقی کا اہم ذریعہ ہیں اور اس سے نہ صرف ان کی جسمانی و ذہنی صحت بہتر ہوتی ہے بلکہ یہ "بلوچستان کا بہتر امیج بھی دنیا کے سامنے پیش کرنے میں معاون ثابت ہوگا۔

انہوں نے ایک سوال کے جواب میں کہا کہ کھیلوں میں سیاست کسی صورت قبول نہیں کی جا ئے گی۔ انہوں نے یقین دلایا کہ صوبائی حکومت بلوچستان بھر میں کھیل کے فروغ کے لیے ہر ممکن اقدامات کر رہی ہے تاکہ نوجوانوں کو صحت مندانہ سرگرمیوں میں شامل کیا جا سکے اور کھیلوں کے میدان میں صوبے کے ٹیلنٹ کو عالمی سطح پر لایا جا سکے۔