تاریخ میں پہلی بار کراپ انشورنس پروگرام متعارف کرایا، کسان کے ذریعے معیشت مضبوط کر رہے ہیں، مریم اورنگزیب

منگل 24 جون 2025 23:03

لاہور (اُردو پوائنٹ اخبارتازہ ترین - آن لائن۔ 24 جون2025ء) سینئر صوبائی وزیر مریم اورنگزیب نے کہا ہے کہ ہماری حکومت نے پنجاب میں پہلی بار کراپ انشورنس پروگرام متعارف کرایا، زراعت ہماری معیشت میں ریڑھ کی ہڈی حثیت رکھتی ہے ، کسان کے ذریعے معیشت مضبوط کر رہے ہیں۔پنجاب اسمبلی میں خطاب کرتے ہوئے انہوں نے اپنی حکومت کی کار کردگی بتاتے ہوے کہا کہ ہم انڈے، کٹے اور مرغیوں سے معیشت نہیں چلا رہے، بلکہ کسان کو بااختیار بنا کر معیشت کی بنیاد مضبوط کر رہے ہیں۔

انہوں نے کہا کہ پہلی بار ایسا ہوا ہے کہ حکومت کے دروازے کھٹکھٹانے کی بجائے، وزیراعلیٰ خود لوگوں کے دروازوں پر رمضان راشن پیک پہنچا رہی ہیں۔ انہوں نے ستھرا پنجاب منصوبے کے تحت پنجاب کی مشینری کو ہر گلی، کوچہ، بازار اور محلے میں متحرک دیکھنے پر خوشی کا اظہار کرتے ہوئے کہا کہ ہم مثالی دیہات کا منصوبہ لا رہے ہیں جہاں صاف پانی، نکاسی آب، سینی ٹیشن اور دیگر سہولیات ہر علاقے کو بلا تفریق فراہم کی جائیں گی، خصوصاً جنوبی پنجاب کو اس میں نمایاں حصہ دیا جا رہا ہے۔

(جاری ہے)

انہوں نے اس بات کا بھی اعتراف کیا کہ ستر سال تک میونسپل ٹیکسز کے نظام کے نہ ہونے کے باعث دیہات کو بلدیاتی سہولیات سے محروم رکھا گیا، لیکن اب دیہاتوں کو سوک سروسز میں شامل کر کے تاریخی قدم اٹھایا گیا ہے۔ انہوں نے ماحولیاتی تحفظ کے دیگر اقدامات کا ذکر بھی کیا جن میں فیکٹریوں کے ویسٹ مینجمنٹ، 60 ایئر کوالٹی مانیٹرنگ یونٹس کی تنصیب، پٹرول کی کوالٹی کنٹرول اور گاڑیوں کے فٹنس سرٹیفکیٹ کا نیا نظام شامل ہے۔