پرو ہاکی لیگ: پاکستانی ہاکی ٹیم کو شرکت کیلئے گرین سگنل مل گیا

انٹرنیشنل ہاکی فیڈریشن کا پی ایچ ایف سے رابطہ ، پاکستان کو مدعو کرلیا

ذیشان مہتاب بدھ 25 جون 2025 14:36

پرو ہاکی لیگ: پاکستانی ہاکی ٹیم کو شرکت کیلئے گرین سگنل مل گیا

لاہور (اردو پوائنٹ تازہ ترین اخبار ۔ 25 جون 2025ء ) پاکستان ہاکی ٹیم کو پرو ہاکی لیگ میں شرکت کیلئے گرین سگنل مل گیا۔

ایکسپریس نیوز کے مطابق انٹرنیشنل ہاکی فیڈریشن نے پاکستان ہاکی فیڈریشن (پی ایچ ایف) سے رابطہ کرکے انہیں لیگ میں شرکت کیلئے مدعو کرلیا۔

نیشنز ہاکی کپ کا فائنل جیتنے والی نیوزی لینڈ کی ٹیم مالی مسائل کے سبب پرو لیگ میں شرکت سے دستبردار ہوئی تو قانون کے مطابق رنر اَپ ٹیم (یعنی پاکستان کو) شامل کیا گیا۔

پرو ہاکی لیگ میں شرکت کے بعد پاکستان ہاکی ٹیم کے کھلاڑیوں کے پاس عالمی رینکنگ بہتر بنانے کا سنہری موقع بھی مل گیا ہے۔

قومی ہاکی ٹیم اس وقت ایف آئی ایچ رینکنگ میں 13ویں پوزیشن پر موجود ہے۔

خیال رہے کہ کیویز کے دیس میں ہاکی کو شوقیہ کھیل سمجھا جاتا ہے، یہی وجہ ہے کہ فیڈریشن مالی بوجھ تلے دبی ہوئی ہے اور گزشتہ برس بھی فتح کے باوجود پرو لیگ کھیلنے سے محروم رہی تھی۔

(جاری ہے)

ادھر پاکستان اور بھارت میں اِسے قومی کھیل کا درجہ حاصل ہے۔ خبریں سامنے آئیں تھی کہ اگر نیوزی لینڈ باضابطہ طور پر دستبردار ہوجاتا ہے تو امکان ہے کہ اس جگہ پاکستان پرو ہاکی لیگ کیلئے کوالیفائی کرجائے۔

ایف آئی ایچ قانون کے تحت فائنلسٹ ٹیم کے دستبردار ہونے کے بعد رنر اِپ ٹیم جگہ پُر کرنے کا حق رکھتی ہے۔

پاکستان ہاکی ٹیم کا اگلا تصدیق شدہ بین الاقوامی اسائنمنٹ ایشیاکپ ہے، جو رواں برس اگست-ستمبر میں بھارت میں شیڈول ہے تاہم دونوں ممالک کے درمیان کشدیدہ حالات کے باعث ایونٹ میں قومی ٹیم کی شرکت پر غیر یقنی کے بادل منڈلا رہے ہیں۔

پاکستان ہاکی فیڈریشن ایشیاکپ کو بھارت سے نیوٹرل وینیو پر منعقد کروانے کی کوشش کررہے ہیں تاکہ پاکستان فروری 2026ء میں ورلڈکپ کے اہم کوالیفائنگ راؤنڈ حصہ لے سکے۔