ہر کوئی پاکستان کیلئے کھیل رہا ہے : عبدالرزاق

ٹیم کی سوچ کافی مثبت لگ رہی ہے، سلیکٹرز نے اچھی ٹیم کا انتخاب کیا، یو اے ای میں یہ ٹیم اچھا پرفارم کرے گی : سابق آل رائونڈر کی گفتگو

Zeeshan Mehtab ذیشان مہتاب پیر 18 اگست 2025 12:30

ہر کوئی پاکستان کیلئے کھیل رہا ہے : عبدالرزاق
کراچی (اردو پوائنٹ تازہ ترین اخبار ۔ 18 اگست 2025ء ) سابق آل راؤنڈر عبدالرزاق نے کہا ہے کہ ٹیم کی سوچ کافی مثبت لگ رہی ہے، ہر کوئی پاکستان کے لیے کھیل رہا ہے۔ 
کراچی میں میڈیا سے گفتگو میں عبدالرزاق نے کہا کہ تین چار ماہ سے ٹیمیں میریٹ پر بن رہی ہیں، پرفارمرز کو موقع مل رہا ہے۔ 
انہوں نے کہا کہ سلیکٹرز نے اچھی ٹیم کا انتخاب کیا، یو اے ای میں یہ ٹیم اچھا پرفارم کرے گی۔

 
عبدالرزاق نے کہا کہ ناصرف سہ فریقی ٹورنامنٹ بلکہ ایشیاء کپ بھی پاکستان ٹیم اپنے نام کرے گی۔ 
واضح رہے کہ پاکستان کرکٹ بورڈ نے یو اے ای میں تین ملکی سیریز اور ایشیا کپ کیلئے اسکواڈ کا اعلان کردیا۔ 
سلیکٹر و ڈائریکٹر ہائی پرفارمنس سینٹر اور ہیڈ کوچ مائیک ہیسن نے لاہور میں پریس کانفرنس کے دوران قومی اسکواڈ کا اعلان کیا، سلمان علی آغا کو کپتان برقرار رکھا گیا ہے۔

(جاری ہے)

 
17 رکنی اسکواڈ میں فخر زمان، شاہین شاہ، حارث رؤف، صائم ایوب، خُوشدل شاہ، حسین طلعت، محمد نواز، محمد وسیم جونیئر، محمد حارث شامل ہیں۔ ابرار احمد، فہیم اشرف، حسن علی، حسن نواز، صاحبزادہ فرحان، سلمان مرزا اور سفیان مقیم بھی اسکواڈ میں شامل ہیں۔ 
قومی سلیکٹر عاقب جاوید نے صحافیوں کے سوالات کا جواب دیتے ہوئے کہا کہ فخر زمان وائٹ بال کرکٹ میں تسلسل کے ساتھ پرفارم کررہے ہیں، صائم ایوب اور صاحبزادہ فرحان کی پرفارمنس بھی بہتر ہوئی ہے۔

ٹیم کی سلیکشن میں کپتان کی مشاورت شامل ہے، 17 رکنی اسکواڈ میں اتنی صلاحیت ہے کہ یہ کسی بھی ٹیم کو شکست دے سکتا ہے۔ 
ہیڈ کوچ مائیک ہیسن کا کہنا کہ ٹی 20 فارمیٹ میں ٹیم اچھا پرفارم کررہی ہے، گزشتہ 9 میچز میں سے 6 میں ہم کامیاب ہوئے، ایک میچ ہم آخری بال پر ہارے، ہمارا فوکس جیت اور اسکے تسلسل پر ہے۔ 
پاکستان، افغانستان اور یو اے ای کی ٹرائی سیریز 29 اگست سے 7 ستمبر سے شارجہ میں ہوگی۔ ایشیا کپ 9 سے 28 ستمبر تک ابو ظبی اور دبئی میں کھیلا جائے گا۔