سپیکر قومی اسمبلی کی خصوصی کوششوں سے قومی اسمبلی و سینیٹ کے ملازمین کیلئے پارلیمنٹ ہائوس میں قائم االائیڈ بینک کے ساتھ آسان شرائط پر قرض سکیم کیلئے مفاہمتی یادداشت پر دستخط

بدھ 25 جون 2025 22:41

اسلام آباد (اُردو پوائنٹ اخبارتازہ ترین - اے پی پی۔ 25 جون2025ء) سپیکر قومی اسمبلی سردار ایاز صادق کی خصوصی کوششوں سے پارلیمنٹ ہائوس میں قومی اسمبلی سیکرٹریٹ کے ملازمین کی فلاح و بہبود کے لیے اہم اقدام، پارلیمنٹ ہائوس میں قائم االائیڈ بینک کے ساتھ آسان شرائط پر قرض سکیم کے لیے مفاہمتی یادداشت پر دستخط کیے گئے۔ اس معاہدے کے تحت قومی اسمبلی اور سینیٹ کے وہ ملازمین جو پارلیمنٹ ہائوس میں قائم الائیڈ بینک کی برانچ کے اکائونٹ ہولڈرز ہیں، وہ اس سکیم سے استفادہ حاصل کر سکیں گے۔

اس موقع پر سپیکر قومی اسمبلی نے کہا کہ اس قرض سکیم کے ذریعے ملازمین کو گھر کی تعمیر، خرید، مرمت اور گاڑی کی خریداری جیسے اہم مقاصد کے لیے مالی معاونت فراہم کی جائے گی جو نہایت آسان شرائط پر دستیاب ہو گی، خاص طور پر کم آمدنی والے ملازمین کے لیے یہ اقدام ان کے ذاتی مکان کے خواب کو حقیقت میں بدلنے میں مددگار ثابت ہو گا۔

(جاری ہے)

سکیم کے تحت قرض کے پراسیس میں ملازمین سے کوئی سروس فیس وصول نہیں کی جائے گی جس پر سپیکر نے الائیڈ بینک کی انتظامیہ کے اس فراخدلانہ اقدام کو سراہا۔

سپیکر سردار ایاز صادق نے مفاہمتی یادداشت پر دستخط کی تقریب کے دوران الائیڈ بینک کی قیادت کا خصوصی شکریہ ادا کیا۔ تقریب میں قومی اسمبلی کے سیکرٹری جنرل طاہر حسین، ایڈیشنل سیکرٹری/پرنسپل سیکرٹری ٹو سپیکر سعید احمد میتلا، مشیر برائے قانون سازی محمد مشتاق، جوائنٹ سیکرٹری عثمان علی انصاری، ڈپٹی سیکرٹری محمد فاروق اور قومی اسمبلی دیگر افسران نے بھی شرکت کی۔

سپیکر قومی اسمبلی نے اس سلسلے میں قومی اسمبلی کے تمام اعلی افسران کی شبانہ روز محنت کو سراہتے ہوئے اس تاریخی فلاحی اقدام کی تکمیل میں ان کے کردار کو قابل ستائش قرار دیا۔مفاہمتی یادداشت پر دستخط کی تقریب میں قومی اسمبلی اور الائیڈ بینک کے اعلیٰ افسران اور دیگر عملے کے ممبران نے شرکت کی۔ تقریب میں شریک قومی اسمبلی سیکرٹریٹ کے افسران و عملے کے ممبران نے سپیکر قومی اسمبلی کے اس احسن اقدام پر ان کا شکریہ ادا کیا اور اسے ملازمین کی فلاح و بہبود کیلئے ایک خوش آئند پیش رفت قرار دیا۔

Facebook Twitter Google + Share on Whatsapp

متعلقہ عنوان :

مزید قومی خبریں