Live Updates

عمران خان سے ملاقات کی درخواست، جسٹس منصور علی شاہ کی علی امین کو چیف جسٹس یحییٰ آفریدی سے رجوع کی ہدایت

ہم جوڈیشل سائیڈ پر کچھ نہیں کر سکتے،چیف جسٹس یا رجسٹرار سپریم کورٹ سے رجوع کریں، یہی بہترین طریقہ ہے، آپ کا وقت بچے گا،ریمارکس

جمعرات 26 جون 2025 03:35

اسلام آباد (اُردو پوائنٹ اخبارتازہ ترین - این این آئی۔ 26 جون2025ء)سپریم کورٹ کے جسٹس منصور علی شاہ نے بانی پی ٹی آئی سے ملاقات بارے علی امین گنڈاپور کی درخواست پر سماعت سے معذرت کرتے ہوئے چیف جسٹس یحییٰ آفریدی سے رجوع کی ہدایت کردی۔ بدھ کو سپریم کورٹ میں جسٹس منصور علی شاہ نے وزیراعلی خیبرپختونخوا کی بانی پی ٹی آئی عمران خان سے ملاقات بارے درخواست پر سماعت کی۔

علی امین گنڈاپور وکلاء ایڈووکیٹ لطیف کھوسہ اور ایڈووکیٹ جنرل خیبرپختونخوا شاہ فیصل کے ہمراہ عدالت کے روبرو حاضر ہوئے۔ وکیل لطیف کھوسہ نے کہا کہ اہم مسئلہ درپیش ہے، کے پی اسمبلی کا بجٹ سیشن چل رہا ہے، بانی پی ٹی آئی سے ملاقات کی درخواست ارجنٹ سنی جائے۔جسٹس منصور علی شاہ نے کہا کہ آپ نے غلط دروازہ کھٹکھٹایا ہے، چیف جسٹس یحییٰ آفریدی پریکٹس اینڈ پروسیجر کمیٹی کے چیئرمین ہیں آپ چیف جسٹس یحییٰ آفریدی یا رجسٹرار سپریم کورٹ سے رجوع کریں، یہی بہترین طریقہ ہے، آپ کا وقت بچے گا،ہم جوڈیشل سائیڈ پر کچھ نہیں کر سکتے۔

(جاری ہے)

وکیل لطیف کھوسہ نے کہا کہ آپ کا آشیرباد چاہتے ہیں، آپ معاملہ چیف جسٹس کو بھجوا سکتے ہیں۔اس موقع پر وزیر اعلی علی امین گنڈاپور روسٹرم پر آئے اور کہا کہ اسمبلی میں بجٹ منظوری کا عمل چل رہا ہے، پارٹی سربراہ کا ایک ویڑن ہوتا ہے، ہماری بار بار کی درخواست کے باوجود بانی پی ٹی آئی سے ملاقات نہیں کروائی گئی۔ انہوں نے کہا کہ تحریک انصاف کی بجٹ کمیٹی بانی پی ٹی آئی سے ملاقات کرے گی، بانی پی ٹی آئی نے سپریم کورٹ کو خط بھی لکھا تھا، خط پر چیف جسٹس یحییٰ آفریدی نے بڑے اچھے ریمارکس دیئے تھے۔

انہوں نے کہا کہ خط کے ساتھ بانی پی ٹی آئی نے ثبوت بھی لگائے تھے لیکن خط پر کوئی عمل نہیں ہوا۔جسٹس منصور علی شاہ نے ریمارکس دیئے کہ چیف جسٹس یحییٰ آفریدی لاہور میں ہیں ان سے رجوع کریں اور ساتھ ہی سماعت ملتوی کردی۔