Live Updates

فلسطین، محمود عباس ڈونلڈ ٹرمپ کے معترف ، غزہ میں بھی جنگ بندی کا مطالبہ

جمعرات 26 جون 2025 08:50

رام اللہ (اُردو پوائنٹ اخبارتازہ ترین - اے پی پی۔ 26 جون2025ء) فلسطینی اتھارٹی کے صدر محمود عباس نے امریکی صدر ڈونلڈ ٹرمپ کی تعریف کی ہے کہ وہ ایران و اسرائیل کے درمیان جنگ بندی کرانے میں کامیاب ہوئے ہیں اور مشرق وسطیٰ میں ایک وسیع تر جنگ کے راستے میں رکاوٹ پیدا کر دی گئی ہے۔العربیہ کے مطابق صدرڈونلڈ ٹرمپ کے نام لکھے گئے اس خط میں انہوں نے ان کی پذیرائی کرنے کے ساتھ ساتھ یہ مطالبہ بھی کیا کہ وہ غزہ میں اسرائیل اور حماس کے درمیان بھی جنگ بندی ممکن بنائیں جہاں اکتوبر 2023 سے جنگ جاری ہے اور اب تک 56 ہزار سے زائد فلسطینی اسرائیلی بمباری میں شہید کئے جا چکے ہیں جن میں زیادہ تعداد خواتین اور بچوں کی ہے۔

صدر محمود عباس نے مزید کہا کہ فلسطینی اتھارٹی امریکا کے ساتھ مل کر اس سلسلے میں کام کرنے کو تیار ہیں۔

(جاری ہے)

نیز سعودی عرب اور دوسرے عرب ملکوں کے ساتھ یورپی اقوام کے ساتھ مل کر بھی اس سلسلے میں کوششیں کرنے کو تیار ہیں تاکہ ایک جامع امن کا عمل ممکن بنایا جا سکے۔ان کا کہنا تھا کہ اسرائیل وحماس کے درمیان جنگ کے خاتمے ، اسرائیلی قبضہ ختم کرنے اور فلسطینی ریاست کے قیام کے لیے مذاکرات کی تیاری کی جا چکی ہے۔

اس لیے آپ اس ناممکن کو ممکن بنا سکتے ہیں اور ایک آزاد، خومختار اور محفوظ فلسطینی ریاست وجود میں آسکے۔صدر فلسطینی اتھارٹی محمود عباس نے امید و اطمینان کا اظہار کیا کہ صدر ٹرمپ اپنی اہلیت کی وجہ سےخطے میں ایک نئی تاریخ رقم کر سکیں گے اور امن بحال ہوگا۔ جو ہماری آنے والی نسلوں کے لیے ضروری ہے۔ جبکہ ہماری کئی نسلیں اس سے محروم ہو چکی ہیں۔