وزیراعلی سندھ کی آئندہ مالی سال کے بجٹ کی منظوری پر اپنی پارٹی قیادت اور اپوزیشن سمیت تمام ارکان سندھ اسمبلی کو مبارکباد

کراچی(اُردو پوائنٹ اخبارتازہ ترین - این این آئی۔ 26 جون2025ء)وزیر اعلی سندھ سید مراد علی شاہ نے آئندہ مالی سال کے بجٹ کی منظوری پر اپنی پارٹی قیادت اور اپوزیشن سمیت تمام ارکان سندھ اسمبلی کو مبارکباد پیش کی ہے جبکہ اپوزیشن لیڈر علی خورشیدی نے اس توقع کا اظہار کیا ہے کہ حکومت سندھ آئندہ اپنی کوتاہیوں کو دور کرنے کی کوشش کرے گی ۔وزیر اعلی سندھ نے بدھ کو سندھ اسمبلی میں بجٹ کی منظوری کے بعد ایوان سے خطاب کرتے ہوئے تمام ارکان اسمبلی کا شکریہ ادا کیا۔

انہوں نے کہا کہ یہ بڑی خوش آئند بات ہے کہ یہاں پر موجود اپوزیشن کے سو فیصد ممبران نے بجٹ بحث میں حصہ لیا۔ انہوں نے کہا کہ صوبہ سندھ ہم سب کا ہے ،ہمیں صوبے سے محبت ہے، اس دھرتی سے پیار کرنا چاہیے۔ ہمیں پوائنٹ اسکورنگ نہیں کرنی چاہیے۔

(جاری ہے)

اللہ کا شکر ہے ایک اور بجٹ سندھ اسمبلی نے پاس کیا ہے۔ انہوں نے کہا کہ اس اہم موقع پر میں پارٹی قیادت، کابینہ اور اسمبلی ممبرز کا شکرگزار ہوں، سب نے حصہ لیا۔

مراد علی شاہ نے کہا کہ جہاں اکثریت ہوتی وہ حکومت بجٹ پاس کروالیتی ہے۔ میرے پاس ہر ممبر کی تقریر موجود ہے، کچھ ممبرز اچھی تجاویز بھی دیتے ہیں جن پر غور کیا سکتا ہے۔ انہوں نے کہا کہ آئندہ کوشش ہوگی کہ بجٹ میں کٹوتی کی تحاریک کو ڈجٹیلائیز کیا جائے۔ انہوں نے بجٹ کی تیاری میں انتھک محنت کرنے پر محکمہ خزانہ سندھ کو خراج تحسین پیش کیا۔

انہوں نے کہا کہ فائنانس کا محکمہ بجٹ کے ایک ماہ سے پہلے رات کو دیر تک بیٹھ کر بغیر کسی چھٹی کے کام کرتے ہیں۔ پی اینڈ ڈی میں نجم شاہ نے بھی اچھا کام کیا۔ اس موقع پر انہوں نے محکمہ خزانہ کے عملے کے لئے بونس کا اعلان کیا انہوں نے کہا کہ اسمبلی کے اسٹاف کو بھی بونس ملے گا۔ اس موقع پر اپوزیشن لیڈر علی خورشیدی نے کہا کہ میں امید کرتا ہوں حکومت اپنی کمی کوتاہیوں کو ٹھیک کرے گی۔

اپوزیشن کے تمام ممبرز کو خراج تحسین کے مستحق ہیں،حکومت کو بھی خراج تحسین پیش کرتا ہوں۔ جماعت اسلامی کے محمد فاروق نے بجٹ کی منظوری پرتمام اراکین کو خراج تحسین پیش کیا اور کہا کہ جمہوری طریقی سے چیزیں چلتی ہیں تو ممبران کو اعتماد حاصل ہوتا ہے ۔انہوں نے کہا کہ سی ایم صاحب تنقید سن لیتے ہیں، مبارکباد دیتا ہوں۔ پی ٹی آئی کے شبیر قریشی نے کہا کہ بجٹ کے موقع پر اپوزیشن اور حکومت کے اراکین نے اپنے اپنے علاقوں کی نمائندگی کی۔

شرجیل میمن اور ضیاء النجار کو مبارکباد دیتا ہوں انہوں نے اچھا کام کیا۔ انہوں نے کہا کہ مراد علی شاہ کا بڑا پن ہے، انہوں آخری تقریر اچھی کی۔ امید کرتا ہوں اب سندھ میں ترقی کا نیا دور شروع ہوگا۔ سندھ کے سینئر وزیرشرجیل انعام میمن نے کہا کہ پورے بجٹ سیشن میں صحافیوں نے بہت اچھا کام کیا۔ کیمرامینز نے دھوپ میں کھڑے ہوکر میڈیا ٹاکز کو کور کیا۔ ہمیشہ بجٹ تلخیوں پر ختم ہوتا تھا، اس دفعہ اچھے ماحول میں بجٹ ختم ہوا۔ اس بات پرسب کو مبارکباد ہیش کرتا ہوں۔ بعدازاں سندھ اسمبلی کا اجلاس برخاست کردیا گیا ۔