تمام دعوؤں کے باوجود اسرائیل کو گھٹنے ٹیکنے پر مجبور کردیا، امریکہ کو جنگ سے کوئی کامیابی حاصل نہیں ہوئی، آیت اللہ خامنہ ای

تہران(اردوپوائنٹ اخبار تازہ ترین۔26جون 2025)ایرانی سپریم لیڈر آیت اللہ خامنہ ای نے کہا ہے کہ تمام دعوؤں کے باوجود اسرائیل کو گھٹنے ٹیکنے پر مجبور کردیا، امریکہ کو اس جنگ سے کوئی کامیابی حاصل نہیں ہوئی، ایرانی حملوں میں صہیونی ریاست پاش پاش ہوگئی،سماجی رابطے کی ویب سائٹ ایکس (ٹوئیٹر)پر اپنے پیغام میں ایران کے سپریم لیڈر آیت اللہ خامنہ ای نے جنگ میں ایران کی فتح کا اعلان کرتے ہوئے ایرانی قوم کو مبارک باد پیش کی ہے۔

آیت اللہ خامنہ ای نے جنگ میں ایران کی فتح کا اعلان کرتے ہوئے کہا کہ امریکہ سے فتح پر ایرانی قوم کو مبارک باد پیش کرتا ہوں۔امریکہ کو اس جنگ سے کوئی کامیابی حاصل نہیں ہوئی۔ امریکہ اس جنگ میں اس لئے داخل ہوا کہ اسے لگا کہ اگر وہ ایسا نہ کرتا تو اسرائیل مکمل تباہ ہو جاتا۔

(جاری ہے)

خامنہ ای نے کہا کہ میری جانب سے ہمارے عزیز ایران کی امریکہ کے ظالم نظام پر فتح پر مبارک ہو۔

انہوں نے کہا کہ  صہیونی ریاست کے خلاف فتح پر ایرانی عوام کو مبارکباد دیتا ہوں۔ بلند بانگ دعوؤں کے باوجود ایرانی حملوں میں صہیونی ریاست پاش پاش ہوگئی۔اپنے پیغام میں ایران کے سپریم لیڈر آیت اللہ خامنہ ای کا مزید یہ بھی کہنا تھا کہ اسلامی جمہوریہ ایران نے امریکہ کے منہ پر زوردار طمانچہ مارا اس نے حملہ کیا اور خطے میں امریکہ کے ایک اہم اڈے، العدید ایئر بیس کو نقصان پہنچایا۔

اسرائیل کے خلاف کامیابی پر مبارکباد پیش کرتا ہوں۔ 9 کروڑ نفوس پر مشتمل قوم متحد، ایک آواز، شانہ بشانہ کھڑی ہو کر افواج کی حمایت میں پیش پیش رہی۔آیت اللّٰہ خامنہ ای نے کہا کہ ایرانی قوم نے اپنے ممتاز کردار کا مظاہرہ کیا۔ ایرانی قوم نے دنیا کو دکھا دیا کہ جب وقت آئے تو یہ قوم ایک آواز بن کر ابھر سکتی ہے۔ان کایہ بھی کہنا تھا کہ امریکہ نے براہ راست جنگ میں اس لئے شرکت کی کیوں کہ اسے محسوس ہوا کہ اگر وہ ایسا نہ کرتا تو صہیونی نظام مکمل طور پر تباہ ہو جاتا۔

اس نے اس نظام کو بچانے کی کوشش میں جنگ میں قدم رکھا لیکن وہ کچھ حاصل نہ کر سکا۔ ایرانی افواج اسرائیل کے کثیر سطح کے دفاعی نظام کو توڑنے میں کامیاب رہی۔آیت اللّٰہ خامنہ ای کایہ بھی کہنا تھا کہ امریکہ نے جوہری تنصیبات کو نشانہ بنایا لیکن وہ کچھ زیادہ حاصل نہیں کرسکا۔ امریکی صدر ٹرمپ شومین شپ چاہتے تھے۔ایران کے خلاف جارحیت کرنے والوں کو آگے بھی بھاری قیمت چکانی پڑے گی۔

واضح رہے کہ اس سے قبل بھی ایرانی سپریم لیڈر آیت اللہ خامنہ ای کا کہنا تھا کہ صہیونیوں سے کوئی سمجھوتا نہیں ہوگا۔ ایران صہیونیوں کے ساتھ کسی قسم کا سمجھوتا نہیں کرے گا۔ اور ان سے سختی سے نمٹا جائے گا۔اپنے ایک بیان میں ایرانی سپریم لیڈر نے اسرائیلی جارحیت کے خلاف سخت جوابی کارروائی کے عزم کو دہرایاتھا۔ انگریزی اور عبرانی زبان میں کئے گئے اپنے پیغام میں خامنہ ای نے لکھا تھاکہ دہشت گرد صہیونی حکومت کو ایک طاقت ور جواب دینا ہوگا اور صہیونیوں پر کوئی رحم نہیں کریں گے۔ فارسی میں ایک اور ٹویٹ میں انہوں نے یہ بھی لکھا تھاکہ ”جنگ شروع ہو گئی تھی۔“