پنجاب میں بارش اور آندھی‘ حادثات میں 7 جاں بحق، 12 زخمی

وزیراعلیٰ پنجاب نے بارش کے دوران لاہور کے مختلف علاقوں کا دورہ کیا اور انتظامات کا جائزہ لیا

جمعرات 26 جون 2025 19:40

پنجاب میں بارش اور آندھی‘ حادثات میں 7 جاں بحق، 12 زخمی

لاہور،جہلم ، بہاولنگر،ملتان (اُردو پوائنٹ اخبارتازہ ترین - آن لائن۔ 26 جون2025ء)پنجاب کے مختلف علاقوں میں تیز آندھی اور موسلا دھار بارش نے تباہی مچا دی، مختلف حادثات میں چار بچوں سمیت سات افراد جاں بحق جبکہ تین خواتین اور دو بچیوں سمیت بارہ افراد زخمی ہو گئے۔وزیراعلیٰ پنجاب مریم نواز نے بارش کے دوران لاہور کے مختلف علاقوں کا دورہ کیا۔

انہوں نے گلبرگ، قذافی اسٹیڈیم، ظہوراللہی روڈ اور مین مارکیٹ میں نکاسی آب کے انتظامات کا جائزہ لیا۔تفصیلات کے مطابق جہلم میں ایک لوڈر رکشہ بارش کے باعث پھسل کر نالے میں جا گرا، جہاں ریسکیو ٹیم نے چھ افراد کو بروقت بچا لیا۔ بہاولنگر میں بارش کے باعث مکان کی چھت گرنے سے چار سالہ بچہ جاں بحق ہو گیا۔چونیاں میں بھی چھت گرنے کے حادثے میں دو کمسن بچیاں زندگی کی بازی ہار گئیں،ملتان میں بوسن روڈ کے قریب آندھی سے گھر کی دیوار گرنے سے تین خواتین ملبے تلے دب کر زخمی ہوئیں۔

(جاری ہے)

محکمہ موسمیات کے مطابق آئندہ چوبیس گھنٹوں کے دوران بھی پنجاب کے کئی علاقوں میں مزید بارشوں کی پیشگوئی ہے، شہریوں کو احتیاطی تدابیر اختیار کرنے کی ہدایت دی گئی ہے۔وزیراعلیٰ پنجاب مریم نواز نے بارش کے دوران لاہور کے مختلف علاقوں کا دورہ کیا۔ انہوں نے گلبرگ، قذافی اسٹیڈیم، ظہوراللہی روڈ اور مین مارکیٹ میں نکاسی آب کے انتظامات کا جائزہ لیا۔

چیف سیکریٹری اور واسا حکام نے وزیراعلیٰ کو نکاسی آب اور سسٹین ایبل ڈویلپمنٹ کے تحت جاری منصوبوں پر تفصیلی بریفنگ دی۔مریم نواز نے کہا کہ قذافی اسٹیڈیم کے اطراف نکاسی آب کا پائیدار سسٹم قابل تحسین ہے۔ بارش کے پانی کا نکاس بروقت اور مؤثر انداز میں جاری ہی.وزیراعلیٰ نے ٹف ٹائلز، پیور تنصیب، رہائشی و کمرشل علاقوں سے تجاوزات کے خاتمے پر بھی موقع پر جائزہ لیا۔