ضلعی انتظامیہ سوات کی جانب سے بیرون ملک مقیم ضلع سوات سے تعلق رکھنے والے شہریوں کے لیے آن لائن ای-کچہری کا انعقاد

سوات(اُردو پوائنٹ اخبارتازہ ترین - این این آئی۔ 26 جون2025ء)ضلعی انتظامیہ سوات کی جانب سے بیرونِ ملک مقیم ضلع سوات سے تعلق رکھنے والے شہریوں کے مسائل کے بروقت حل اور ضلعی انتظامیہ تک براہ راست رسائی کو یقینی بنانے کے لیے آن لائن ای-کچہری کا انعقاد کیا گیا۔ ای-کچہری ڈپٹی کمشنر سوات شہزاد محبوب کی زیر صدارت ڈپٹی کمشنر سوات کے فیس بک پیج پر براہ راست نشر کی گئی، جس میں بیرون ملک مقیم شہریوں سمیت مقامی لوگوں نے بھرپور شرکت کرتے ہوئے مختلف مسائل پر اپنی آرا اور شکایات پیش کیں۔

ای-کچہری میں اسسٹنٹ کمشنر بابوزئی ڈاکٹر ندا اقبال، ایڈیشنل اسسٹنٹ کمشنر-II بابوزئی طارق خان، پی ایم آر یو (PMRU) سٹاف، ضلعی انتظامیہ سوات کے متعلقہ برانچ انچارجز اور دیگر افسران بھی موجود تھے، جنہوں نے موصول ہونے والے شکایات اور مسائل پر تفصیلی تبادلہ خیال کیا۔

(جاری ہے)

ڈپٹی کمشنر سوات نے ای کچہری میں شرکا کو خوش آمدید کہتے ہوئے ای-کچہری کے انعقاد کا مقصد بیان کیا اور کہا کہ صوبائی حکومت خیبرپختونخوا کی ہدایات کی روشنی میں عوامی مسائل کا بروقت حل ضلعی انتظامیہ کی اولین ترجیح ہے، اور یہ ای-کچہری عوامی شمولیت کو فروغ دینے کی ایک مثر کاوش ہے۔

ای- کچہری کے دوران عوام کی جانب سے متعدد اہم مسائل سامنے آئے جن میں موبائل نیٹ ورک کی ناقص سروس، بجلی چوری کے باعث لوڈشیڈنگ، گریوٹی واٹر اسکیم کے بعد گلیوں کی عدم بحالی، پولٹری اور دیگر اشیائے خوردونوش کی قیمتوں میں بے ضابطگیاں، رکشہ کرایوں میں غیر قانونی اضافہ، رنگ محلہ میں پارکنگ کا مسئلہ، دریائے سوات میں غیر قانونی نہانے اور غیر قانونی کرش مشینوں کی سرگرمیاں، غیر قانونی اسپیڈ بریکرز، دریائے سوات میں سیوریج اور بیت الخلا کا گند پھینکنے جیسے سنگین ماحولیاتی مسائل، تجاوزات اور ون ویلنگ جیسے غیر قانونی عوامل شامل تھے۔

ڈپٹی کمشنر سوات نے تمام شکایات کو نہایت سنجیدگی سے سنا اور موقع پر ہی متعلقہ افسران کو فوری احکامات جاری کیے۔ تحصیل بریکوٹ سے دریائے سوات کے کنارے غیر قانونی مائننگ کی شکایت پر فوری نوٹس لیتے ہوئے، ڈپٹی کمشنر نے اسسٹنٹ کمشنر بریکوٹ کو موقع پر جا کر قانونی کارروائی کی ہدایت جاری کی جبکہ دیگر تمام مسائل کے حل کے حوالے سے بھی تمام متعلقہ اداروں کے حکام کو جلد از جلد اقدامات اٹھانے کے ہدایات جاری کئے۔ صفائی کی صورتحال کے حوالہ سے موصول ہونے والے شکایات کے حل کیلئے واٹر اینڈ سینیٹیشن سروسز کمپنی اور تحصیل میونسپل انتظامیہ کو ہدایات جاری کی گئی۔