کمشنر سبی ڈویژن سید زاہد شاہ کی زیر صدارت محرم الحرام کے پرامن اور منظم انعقاد کو یقینی بنانے کے لیے سیکیورٹی و انتظامی امور کا جائزہ لینے کیلئے اجلاس کا انعقاد

جمعہ 27 جون 2025 23:00

کوئٹہ (اُردو پوائنٹ اخبارتازہ ترین - اے پی پی۔ 27 جون2025ء) کمشنر سبی ڈویژن سید زاہد شاہ کی زیر صدارت محرم الحرام کے پرامن اور منظم انعقاد کو یقینی بنانے کے لیے سیکیورٹی و انتظامی امور کا جائزہ لینے کیلئے اجلاس منعقد ہوا۔ ڈی آئی جی پی سبی رینج معروف صفدر واہلہ ، کمانڈنٹ سبی سکاؤٹس بریگیڈئیر عمر الطاف ، ایس ایس پی سبی اختر نواز، اسسنٹ کمشنر سبی منصور علی شاہ سمیت دیگر قانون نافذ کرنے والے اداروں کے افسران نے اجلاس میں شرکت کی ۔

اجلاس میں محرم الحرام کے دوران ڈویژن بھر میں مجالس و جلوسوں کے سیکیورٹی انتظامات، صفائی، روٹس کی سویپنگ، سی سی ٹی وی مانیٹرنگ اور ایمرجنسی سروسز کی دستیابی کا تفصیلی جائزہ لیا گیا ۔کمشنر سبی نے تمام اداروں کو ہدایت دی کہ جلوس کے روٹس کی صفائی، پانی کی نکاسی اور سویپنگ ہر مجلس سے پہلے مکمل کی جائے ۔

(جاری ہے)

انہوں نے کہا کہ ہسپتالوں میں ایمرجنسی کا نفاذ رہے ڈاکٹروں اور پیرا میڈیکل اسٹاف کی چھٹیاں منسوخ کر دی گئی ہیں، ڈاکٹرز سمیت تمام عملہ ان دنوں حاضر رہے متعلقہ ادارہ جلوسوں سے پہلے تمام راستوں کی بی ڈی اور کلیئرنس کرے۔

ایمبولینس، فائر برگیڈ کی گاڑیاں جلوسوں کے ہمراہ رہیں سی سی ٹی وی کیمروں اور کنٹرول رومز کو فعال اور مانیٹرنگ پر رکھا جائے۔کمشنر سبی نے اسسٹنٹ کمشنر کو ہدایت دی کہ محرم الحرام خصوصاً 9 اور 10 محرم کو لوڈشیڈنگ کے اوقات میں تبدیلی یا معطلی کو ممکن بنایا جائے تاکہ مجالس اور جلوس متاثر نہ ہوں۔ اجلاس کے اختتام پر کمشنر سبی سید زاہد شاہ نے افسران کو تاکید کی کہ محرم الحرام کے دوران بین المذاہب ہم آہنگی، امن و امان اور صفائی و سہولیات پر کوئی سمجھوتہ نہ کیا جائے۔ تمام ادارے مکمل ہم آہنگی سے کام کریں تاکہ شہری محفوظ اور پْرامن ماحول میں عبادات انجام دے سکیں۔