پنجاب میں موسلادھار بارش،مختلف حادثات میں 12افراد جاں بحق ہوئے ‘پی ڈی ایم اے

ہفتہ 28 جون 2025 16:29

لاہور (اُردو پوائنٹ اخبارتازہ ترین - این این آئی۔ 28 جون2025ء) پنجاب بھر میں حالیہ موسلا دھار بارشوں اور آندھی کے نتیجے میں مختلف حادثات رونما ہوئے، جن کی تفصیلات پی ڈی ایم اے نے جاری کر دی ہیں۔ترجمان پی ڈی ایم اے کے مطابق 25جون سے 27جون 2025کے دوران مختلف شہروں میں مجموعی طور پر 25حادثات رپورٹ ہوئے۔رپورٹ میں بتایا گیا کہ ان حادثات میں 12افراد جاں بحق جبکہ 39زخمی ہوئے، جاں بحق ہونے والوں میں خواتین اور بچے بھی شامل ہیں، زیادہ تر ہلاکتیں چھتیں اور دیواریں گرنے کے باعث ہوئیں، جس کے مجموعی طور پر 28واقعات ریکارڈ پر آئے۔

پی ڈی ایم اے کے ترجمان کا کہنا تھا کہ بہاولنگر، فیصل آباد، اور خانیوال سمیت دیگر اضلاع میں بھی نقصان دہ حادثات رپورٹ ہوئے ہیں۔ڈی جی پی ڈی ایم اے عرفان علی کاٹھیا نے زخمیوں کو بہترین طبی امداد فراہم کرنے کی ہدایت کی۔

(جاری ہے)

ڈی جی پی ڈی ایم اے کا کہنا تھا کہ وزیر اعلی پنجاب کی ہدایات کے مطابق جاں بحق افراد کے لواحقین کی مالی معاونت فراہم کی جائے گی ۔

انہوں نے شہریوں سے التماس ہے کہ خراب موسم کی صورتحال میں غیر ضروری سفر سے گریز کریں ، مخدوش و بوسیدہ مکانات میں ہرگز رہائش پذیر نہ ہوں۔بچوں کا خیال رکھیں، برساتی نالوں و بجلی کی تاروں اور کھمبوں کے قریب ہرگز نہ جانے دیں، مون سون بارشوں کا یہ سپیل 1 جولائی تک جاری رہنے کی پیشگوئی ہے۔ہنگامی صورتحال میں پی ڈی ایم اے ہیلپ لائن 1129 پر رابطہ کریں۔ اتھارٹی نے متعلقہ ضلعی انتظامیہ کو ہنگامی اقدامات کرنے اور عوام کو احتیاطی تدابیر اختیار کرنے کی ہدایت جاری کر دی ہے۔