ٴْپنجاب ایمپلائز سوشل سکیورٹی کا محنت کشوں اور ان کے اہل خانہ کے لیے ایک تاریخ ساز اقدام

پہلے مرحلے میں لاہور، شاہدرہ، اسلام آباد، گوجرانوالہ، ملتان اور فیصل آباد کے سوشل سکیورٹی ہسپتالوں میں شام کی شفٹ شروع کی جائیگی /ڈینٹل اور فزیو تھراپی کی سہولیات بھی شام کے وقت مہیا کی جائیں گی، ڈاکٹر وقاص رشید اور ڈاکٹر حمیرا بزدار کی میڈیا بریفنگ

ہفتہ 28 جون 2025 19:25

،لاہور (اُردو پوائنٹ اخبارتازہ ترین - آن لائن۔ 28 جون2025ء) پنجاب ایمپلائز سوشل سکیورٹی نے محنت کشوں اور ان کے اہل خانہ کے لیے ایک تاریخ ساز اقدام اٹھایا ہے۔ نواز شریف سوشل سکیورٹی ہسپتال لاہور میں یکم جولائی سے شام کی شفٹ کا آغاز کیا جا رہا ہے۔ اس منصوبے کا آغاز وزیراعلیٰ پنجاب محترمہ مریم نواز شریف کی خصوصی ہدایت پر کیا جا رہا ہے تاکہ محنت کشوں کو ان کے ڈیوٹی اوقات کے بعد بھی معیاری علاج کی سہولت فراہم کی جا سکے۔

اس اقدام کی تفصیلات سے آگاہ کرنے کے لیے ہسپتال کے میڈیکل سپرنٹنڈنٹ ڈاکٹر وقاص رشید اور میڈیکل ایڈوائزر ڈاکٹر حمیرا بزدار نے میڈیا بریفنگ میں بتایا کہ ابتدائی مرحلے میں شام کی او پی ڈی میں میڈیسن، سرجری، گائنی، اور ریڈیالوجی کی سہولیات فراہم کی جائیں گی۔

(جاری ہے)

اس کے ساتھ ساتھ ڈینٹل اور فزیو تھراپی کی سہولیات بھی شام کے وقت مہیا کی جائیں گی۔

شام کی شفٹ کا دائرہ کار پہلے مرحلے میں لاہور، شاہدرہ، اسلام آباد، گوجرانوالہ، ملتان اور فیصل آباد کے سوشل سکیورٹی ہسپتالوں تک پھیلایا گیا ہے۔ ان ہسپتالوں میں شام کے اوقات میں بھی سینئر کنسلٹنٹس اور ماہر ڈاکٹرز موجود ہوں گے تاکہ محنت کش اور ان کے اہل خانہ با آسانی اپنا علاج کروا سکیں۔ یہ سہولت اس لیے اہم ہے کہ محنت کشوں کو دن کے وقت کام سے چھٹی لینے کی ضرورت نہیں پڑے گی، ان کا روزگار متاثر نہیں ہوگا اور آجرین کو بھی عملے کی غیر حاضری کا سامنا نہیں کرنا پڑے گا۔

اس موقع پر صوبائی وزیر محنت فیصل ایوب کھوکھر اور کمشنر سوشل سکیورٹی محمد علی نے ہسپتال انتظامیہ کی کاوشوں کو سراہا اور اسے محنت کشوں کی فلاح کی طرف اہم پیش رفت قرار دیا۔ میڈیکل ایڈوائزر ڈاکٹر حمیرا بزدار نے کہا کہ شام کی شفٹ کا آغاز محنت کشوں کی صحت، وقت اور روزگار کے تحفظ کی جانب ایک بڑا قدم ہے۔میڈیا بریفنگ میں ادارے کے جاری اور مکمل منصوبہ جات پر بھی روشنی ڈالی گئی۔ اس موقع پر ڈائریکٹر جنرل ہیڈ کوارٹر اظہر حسین منہاس و دیگر اعلیٰ افسران اور ڈاکٹرز نے بھی شرکت کی۔