پیپلزپارٹی والے مریم نواز کی کارکردگی سے خوفزدہ ،مقابلہ کارکردگی پر ہونا چاہیے‘عظمیٰ بخاری

لاہور (اُردو پوائنٹ اخبارتازہ ترین - این این آئی۔ 01 اکتوبر2025ء) وزیر اطلاعات پنجاب عظمیٰ بخاری نے کہا ہے کہ پیپلزپارٹی والے وزیر اعلیٰ پنجاب مریم نواز شریف کی پرفارمنس سے خوفزدہ ہو کر الٹے سیدھے بیانات دیتے ہیں، مقابلہ کارکردگی پر ہونا چاہیے، اگر اتحادی ڈھنگ کا مشورہ دیں تو ہم کیوں نہیں لیں گے مگر ہر بات پر ٹانگ کھینچنا اور صوبے کے انتظامی معاملات میں گھسنا مناسب نہیں، سیزفائر دوسری جانب سے ہو جائے تو مناسب ہے کیونکہ یہ معاملہ ہم نے شروع نہیں کیا۔

انہوں نے نجی ٹی وی کے پروگرام میں گفتگو کرتے ہوئے کہا کہ پنجاب پر سیلاب کی صورت میں بڑی آفت آئی، آپ کا سیلاب سے نمٹنے میں کوئی کردار نہیں، آپ نے پنجاب گورنمنٹ کی مدد کے بجائے سیلابی صورتحال پر سیاست شروع کر دی۔

(جاری ہے)

انہوں نے کہا کہ آپ کسان کی بات بھی کرتے ہیں، کسان کو امدادی قیمت آئی ایم ایف پروگرام کی وجہ سے نہیں دی جا رہی، سندھ میں بھی کسان کو قیمت نہیں دی گئی وہاں بھی گندم پیدا ہوتی ہے، بار بار ان کے لوگ اٹھ کر کہتے ہیں پنجاب کا کسان مرگیا، سندھ کا کسان کیوں نہیں مرا ۔

انہوں نے کہا کہ ہر بات پر ٹانگ کھینچنا اور صوبے کے انتظامی معاملات میں گھسنا مناسب نہیں، کیا ہم نے کبھی پوچھا ہے کہ سندھ میں کیا ہو رہا ہی ہماری طرف کوئی کنفیوژن نہیں، کنفیوژن دوسری طرف ہے، سندھ میں سیلاب آیا تو ہماری حکومت نے کوئی سیاسی بیان نہیں دیا، وزیراعظم شہبازشریف نے سیلاب میں سندھ کو سپورٹ کیا، سندھ میں بہت سارے پروجیکٹ وفاق کی مدد سے چل رہے ہیں، پنجاب میں کوئی ایسا پروگرام نہیں جو وفاق کی مدد سے چل رہا ہو۔

عظمیٰ بخاری نے کہا کہ یہ بھی بات کی گئی کہ بیرونی امداد کیوں نہیں لی، ہم بیرونی امداد نہیں لینا چاہتے کیا کوئی زبردستی ہی پنجاب اگر 25لاکھ افراد، 21لاکھ مویشیوں کو سیلاب میں ریسکیو کر سکتا ہے تو وہ ان کی واپس آبادکاری بھی کر سکتا ہے، آپ اس اقدام کو سراہیں کہ پنجاب اپنے وسائل سے سب کچھ کر رہا ہے کسی کے سامنے ہاتھ نہیں پھیلا رہا۔انہوں نے کہا کہ یہ بضد ہیں کہ آپ دوسروں کے سامنے ہاتھ پھیلائیں اور بیرونی امداد لیں، ایسا نہیں ہوسکتا، بی آئی ایس پی سے کسی کو کوئی مسئلہ نہیں، نوازشریف کے دور میں وفاقی حکومت کی جانب سے بی آئی ایس پی کو قانونی حیثیت بھی دی گئی۔

انہوں نے کہا کہ ضروری نہیں کہ سیلاب متاثرین کی بی آئی ایس پی سے مدد کی جائے، کئی کاشتکار ایسے ہوں گے جن کا بی آئی ایس پی سے لینا دینا نہیں، جو بی آئی ایس پی میں رجسٹرڈ نہیں ان کی ہم کیسے مدد کریں گی آپ کو بی آئی ایس پی کا کارڈ بیچنے کی سیلاب میں ضرورت محسوس ہوئی ۔ ان کا کہنا تھا کہ سیز فائر کا آپشن بالکل موجود ہوتا ہے، یہ معاملہ ہم نے شروع نہیں کیا نا اس کو ختم کرنے کی ہماری طرف سے کوئی گارنٹی ہے، اگر اتحادی ڈھنگ کا مشورہ دیں تو ہم کیوں نہیں لیں گے، پیپلزپارٹی پنجاب سیلاب متاثرین کیلئے اتحادی کے طور پر مل کر کام کرنا چاہے تو ہم حاضر ہیں۔

عظمیٰ بخاری نے کہا کہ پیپلزپارٹی کو وزیراعلی مریم نواز کی پرفارمنس سے خوف آتا ہے، یہ خوف کا شکار ہو کر الٹے سیدھے بیانات دیتے ہیں، سیزفائر دوسری جانب سے ہو جائے تو مناسب ہے کیونکہ یہ معاملہ ہم نے شروع نہیں کیا، مفروضوں پر بات کرنا نامناسب ہے۔صوبائی وزیر کا مزید کہنا تھا کہ پیپلزپارٹی ہماری اتحادی جماعت ہے، ملکی استحکام کیلئے یہ ضروری ہے، سندھ میں ٹرانسپورٹ کی حالت ٹھیک ہوجائے تو ہمیں خوشی ہوگی، آپ کی 17سال سے سندھ میں حکومت ہے، کارکردگی پر مقابلہ ہونا چاہیے، خوامخواہ الزام تراشی اورپرفارم کرتی حکومت پر تنقید کی جاتی ہے، ان کے کچھ لوگ رہتے پنجاب میں ہیں اور سیاست کسی اور صوبے کیلئے کرتے ہیں۔