عدالت نے فیض آباد احتجاج کیس کی سماعت 10جولائی تک ملتوی کردی

منگل 1 جولائی 2025 20:05

اسلام آباد (اُردو پوائنٹ اخبارتازہ ترین - این این آئی۔ 01 جولائی2025ء)عدالت نے فیض آباد احتجاج کیس کی سماعت 10جولائی تک ملتوی کردی۔منگل کو انسداد دہشت گردی عدالت نمبر 2اسلام آباد میں جج طاہر عباس سپرا نے بانی پی ٹی آئی کی نااہلی پر فیض آباد کے مقام پر احتجاج سے متعلق مقدمے پر سماعت کی۔

(جاری ہے)

ملزمان واثق قیوم عباسی ، راجہ راشد حفیظ ، راجہ ماجد ودیگر ملزمان عدالت میں پیش ہوئے جبکہ فیصل جاوید ، راجہ ماجد حیدر بن مسعود ودیگر ملزمان نے وکالت نامے جمع کرائے، فیصل جاوید کی جانب سے حاضری کی استثنیٰ کی درخواست دائر کی گئی۔

جج طاہر عباس سپرا نے کہا کہ شہادتوں کیلئے آج 10.30کا ٹائم رکھ لیتے ہیں ، ملزمان ٹرائل میں رکاوٹ ڈال رہے ہیں۔وکیل صفائی نے کہا کہ آج آپ 10جولائی کی تاریخ دے دیں، جج طاہر عباس سپرا نے کہا کہ علی امین گنڈا پور اشتہاری ہیں جو پورا اسلام آباد پھر رہے ہیں ہر عدالت میں جاتے ہیں صرف یہاں پیش نہیں ہوتے، میں 10جولائی کی تاریخ دے رہا ہوں اس دن کوئی کیس نہیں رکھ رہا پھر تاریخ تبدیل نہیں ہو گی۔بعد ازاں کیس کی سماعت ملتوی کردی گئی۔