کوئٹہ ،ساتویں تا دسویں محرم تک امام بارگاہوںسے منسلک فیڈرز لوڈشیڈنگ سے مستثنیٰ قرار

کوئٹہ(اُردو پوائنٹ اخبارتازہ ترین - این این آئی۔ 02 جولائی2025ء)کوئٹہ الیکٹرک سپلائی کمپنی(کیسکو)نے ساتویں، نویں اور دسویں محرم الحرام کو بجلی کی باقاعدہ اور مسلسل فراہمی کے لئے مختلف انتظامات کردئیے ہیں۔اس سلسلے میں بجلی کی مسلسل فراہمی اور صارفین کی شکایات کابروقت ازالہ کرنے کیلئے مرکزی مانیٹرنگ اورایمرجنسی کنٹرول سینٹر (ٹیلی فون نمبر 081-9201445 اور 0812829753 )قائم کردیاگیاہے ۔

جوکہ 24گھنٹے 3شفٹوںمیں مسلسل کام کرے گا۔کیسکوکی مرکزی مانیٹرنگ اورایمرجنسی کنٹرول سینٹرصوبائی حکومت کے ایمر جنسی کنٹرول سینٹر 15 یعنی مددگار سینٹرسے ان متعلقہ فیڈروں کے سلسلے میںبجلی کی صورتحال پر مسلسل رابطہ میں رہے گا۔کوئٹہ شہر میں ساتویں، نویں اور دسویں محرم الحرام کو امام بارگاہوں سے منسلک فیڈروںکو لوڈشیڈنگ سے مستثنی قراردے دیا گیاہے۔

(جاری ہے)

اسکے علاوہ محرم الحرام کے جلوس والے راستوںمیں بجلی کی مسلسل فراہمی اور صارفین کی شکایات کا بروقت ازالہ کیلئے مرکزی مانیٹرنگ و ایمرجنسی کنٹرول سینٹرکسی بھی علاقہ میںبجلی منقطع ہونے کی صورت یا شکایت موصول ہونے کے بعد بجلی کی دوبارہ بحالی کیلئے ہنگامی بنیادوںپر اقدامات کرے گا ۔کوئٹہ شہر میں امام بارگاہوں سے منسلک فیڈروں مری آباد ،سید آباد، گلستان، لیاقت بازارایکسپریس، طوغی روڈ، ہزارہ ٹاون، کرانی،سیٹلائٹ ٹاون اور مغربی بائی پاس فیڈرز کو ساتویں،نویں اور دسویں محرم الحرام میں لوڈشیڈنگ سے مستثنیٰ قراردئیے گئے ہیںا لبتہ کسی بھی علاقے میں فنی خرابی کو دورکرنے اور بجلی کی دوبارہ بحالی کے لئے تکنیکی ٹیم اور متعلقہ فیڈرکے سب ڈویژنل افسران (SDO)اپنے عملہ کے ساتھ دفاترمیں موجودرہیں گے تاکہ بجلی سے متعلق کسی بھی ایمرجنسی سے بروقت نمٹاجاسکے۔

علاوہ ازیں کوئٹہ شہر سے باہر صوبہ کے دیگر علاقوں میں صر ف دسویں محرم الحرام کو امام بارگاہوں سے منسلک فیڈروں پرصبح5بجے سے رات 12بجے تک کوئی لوڈشیڈنگ نہیں کی جائے گی جن میں روجھان جمالی، جھل مگسی، اوستہ محمد، ڈیرہ مرادجمالی، گنداخہ، صحبت پور، بھاگ، سبی،لورالائی،خضدار، مچھ اور ژوب کے علاقوں میں امام بارگاہوں سے منسلک فیڈرز شامل ہیں۔