وزارتِ قومی ورثہ و ثقافت کے اداروں کی کارکردگی بہتر بنانے کیلئے اقدامات تیز، وزیر اورنگزیب کھچی کی زیر صدارت اجلاس

اسلام آباد (اُردو پوائنٹ اخبارتازہ ترین - این این آئی۔ 02 جولائی2025ء)وزیرِ قومی ورثہ و ثقافت محمد اورنگزیب کھچی کی زیر صدارت وزارت کے ذیلی اداروں کے حوالے سے ایک اہم اجلاس منعقد ہوا، جس میں اداروں کی فعالیت، کارکردگی اور مستقبل کے منصوبوں پر تفصیلی تبادلہ خیال کیا گیا۔اجلاس میں وفاقی وزیر نے کہا کہ وزیراعظم محمد شہباز شریف نے قومی ورثے، تاریخ، ادب اور ثقافت کے تحفظ کے حوالے سے خوش دلی سے ہمارا ساتھ دیا اور اداروں کی ممکنہ خاتمے یا ضم ہونے کی پالیسی کو واپس لے لیا ہے۔

اب ہماری ذمہ داری ہے کہ عملی کارکردگی دکھائیں تاکہ وزیراعظم خود ان اداروں کی کارکردگی دیکھ سکیں۔انہوں نے کہا کہ ہماری تجاویز پر عملدرآمد کیلئے سینیٹر عرفان الحق صدیقی ہر ممکن ہمارا ساتھ دیں گے، اداروں کو نئے خطوط پر استوار کرنے اور فعال بنانے کے لیے آپ کی آراء درکار ہیں۔

(جاری ہے)

وزیر قومی ورثہ و ثقافت نے اقبال اکیڈمی، پاکستان اکادمی ادبیات، نیشنل لینگویج پروموشن ڈیپارٹمنٹ (NLPD) اور قائداعظم اکیڈمی جیسے اداروں کو زیادہ مؤثر اور متحرک بنانے پر زور دیا۔

انہوں نے کہا کہ اقبال کے پیغام کو بنگالی سمیت دیگر زبانوں میں ترجمہ کرنے کی ضرورت ہے تاکہ ان کا پیغام زیادہ وسیع پیمانے پر پھیلایا جا سکے۔ وزیر نے اعلان کیا کہ اقبال اکیڈمی کو اسلام آباد منتقل کرنے کی تیاری کی جا رہی ہے تاکہ سیاح زیادہ تعداد میں یہاں کا رخ کریں۔پال کی نمائندہ نجیبہ عارف نے اداروں میں زیر التواء پروموشنز پر پیش رفت سے آگاہ کیا، جبکہ NLPD کے ڈی جی ڈاکٹر سلیم مظہر نے بتایا کہ ترقیوں کا عمل مکمل ہو چکا ہے۔

ڈاکٹر رؤف رفیقی نے بتایا کہ اقبال اکیڈمی کے تحت 89 کتب کا ترجمہ اور 56 کتب کی اشاعت ہو چکی ہے۔ڈی جی آرکیالوجی امان اللہ نے ادارے کے آڈٹ اور کارکردگی میں بہتری کے لیے جاری اقدامات پر بریفنگ دی۔ اورنگزیب کھچی نے ہدایت دی کہ اس ادارے کی کارکردگی بہتر بنانے کیلئے نئے منصوبے شروع کیے جائیں۔وزیر نے کہا کہ قومی ورثہ و ثقافت کے اداروں کی افادیت اور کارکردگی اجاگر کرنے کے لیے ملک کے بڑے شہروں خصوصاً صوبائی دارالحکومتوں میں خصوصی پروگرامز منعقد کیے جائیں گے۔

اجلاس میں بتایا گیا کہ آذربائیجان اور چین کے صدور کی کتابوں کا ترجمہ مکمل ہو چکا ہے، جو ان کے دورہ پاکستان کے موقع پر بطور تحفہ پیش کی جائیں گی۔وزیر اورنگزیب کھچی نے کہا کہ یہ ادارے قومی شناخت کی علامت ہیں اور انہیں منافع کے بجائے قومی خدمت کے جذبے سے چلایا جاتا ہے۔ انہوں نے تمام اداروں کو ہدایت دی کہ ریٹائرڈ ملازمین کے بعد خالی ہونے والی آسامیوں پر فوری تعیناتیوں کا عمل مکمل کیا جائے تاکہ ادارے بہتر طور پر اپنا کردار ادا کر سکیں۔