پاکستان کی خوبصورت، قدرتی مناظر اور ثقافت سے متاثر ہو کر سیاح پاکستان کا رخ کرنے لگے

عمان کے بائیکرز کلب کا پاکستان کا سیاحتی دورہ، پاکستانی ثقافت اور مہمان نوازی کی تعریف

بدھ 2 جولائی 2025 21:00

اسلام آبا د(اُردو پوائنٹ اخبارتازہ ترین - این این آئی۔ 02 جولائی2025ء) عمان کے بائیکرز کلب نے پاکستان کا سیاحتی دورہ کرتے ہوئے پاکستانی ثقافت اور مہمان نوازی کی تعریف کی ہے ۔عمانی بائیکرماجد عبداللہ الراوحی نے کہاکہ پاکستان بہت خوبصورت اور محفوظ ملک ہے، پاکستان کے لوگ بہت دوستانہ اور وہ آپ کو خوش آمدید کہتے ہیں، غیر ملکی سیاح آسانی سے پاکستان آسکتے ہیں ، ان کیلئے ہر قسم کے سیاحتی مقامات موجود ہیں۔

انہوں نے کہا کہ پاکستانی عوام اور حکومت دونوں نے ہماری بے حد مہمان نوازی کی اور انتہائی گرم جوشی سے ہمارا استقبال کیا۔محمد جمعہ صالح الراوحی نے کہا کہ پاکستان آنا میرے لئے خوشگوار تجربہ ہے، پاکستان کے بارے میں جو منفی تاثر پھیلا گیا یہ ملک اس سے بہت مختلف ہے، میں دل کی گہرائیوں سے یہ کہنا چاہوں گا کہ غیر ملکی سیاح پاکستان کا دورہ ضرور کریں۔

(جاری ہے)

محمد حسن عیسیٰ المانی نے کہا کہ ہمارا پاکستان کا دورہ بہت شاندار رہا ہے اورہمارا یہ سفر ہر قسم کے موسموں کا حسین امتزاج تھا، بائیکنگ اور سیاحت کے شوقین حضرات کیلئے پاکستان ایک بہترین ملک ہے، پاکستان میں کمیپنگ اور مہم جوئی کے بہت زیادہ مقامات موجود ہیں۔عمانی بائیکر کامل نصیر علی نے پیغام دیا کہ اگر نئے سیاحتی مقامات دریافت کرنا چاہتے ہیں تو پاکستان کا سفر ضرور کریں۔اوور سیز پاکستانی محمد کاشف نے کہا کہ شمالی پاکستان کا سفر ایک ناقابل فراموش تجربہ تھا۔عاطف علی نامی ایک اوورسیز پاکستانی نے کہا کہ اسلام آباد سے خنجراب پاس کا شاندار سفر، شمالی علاقوں کی بے مثال مہمان نوازی نے بہت متاثر کیا۔