وزیراعلیٰ پنجاب کا ڈی ایچ کیو ہسپتال پاکپتن کے ایم ایس کیخلاف سخت ایکشن، گرفتار کرنے کا حکم

جمعہ 4 جولائی 2025 20:06

پاکپتن (اُردو پوائنٹ اخبارتازہ ترین - این این آئی۔ 04 جولائی2025ء)وزیراعلیٰ پنجاب مریم نواز نے ڈسٹرکٹ ہیڈکوارٹر ہسپتال پاکپتن کے دورے کے دور ان سی او ہیلتھ پاکپتن اور ایم ایس ڈاکٹر عدنان غفار کیخلاف مجرمانہ غفلت پرمقدمہ درج اور گرفتار کرنے کی ہدایت کردی۔ جمعہ کو وزیراعلیٰ پنجاب مریم نواز ڈی ایچ کیو ہسپتال پاکپتن پہنچیں، جہاں مریضوں اور اہل خانہ نے ہسپتال میں بد نظمی ، غفلت اور دیگر شکایات کے انبار لگا دئیے۔

مریضوں اور لواحقین کی شکایات پر وزیراعلیٰ مریم نواز نے سخت ایکشن لیتے ہوئے سی او ہیلتھ پاکپتن اور ایم ایس ڈاکٹر عدنان غفار کیخلاف مجرمانہ غفلت پر مقدمہ درج کرکے گرفتار کرنے کی ہدایت کردی۔وزیراعلیٰ نے ساہیوال سے نئے ایم ایس کو ڈی ایچ کیو ہسپتال پاکپتن تعینات کرنے کا حکم جاری کردیا۔

(جاری ہے)

وزیراعلیٰ کے دورے پر مریضوں اور ان کے اہل خانہ نے 50 سے 100 روپے پارکنگ فیس لینے کی شکایت بھی جس پر اوور چارجنگ کی شکایت پر پارکنگ کمپنی کے مالک اور انچارج کی گرفتاری کی ہدایت کردی۔

وزیراعلیٰ مریم نواز نے پرائیویٹ لیب سے ملی بھگت کرنے پر تین لیب ٹیکنیشن کو فارغ کردیا جبکہ پاکپتن ہسپتال کے عملے سے ملی بھگت پر تین پرائیویٹ لیب سیل کرنے کا حکم دیا۔وزیراعلی پنجاب نے ڈی سی پاکپتن کو چارج چھوڑنے اور ہسپتال کے ایکوپمنٹ آڈٹ کا بھی حکم جاری کیا۔اس موقع پر وزیراعلیٰ نے کہا کہ ذمہ داروں کو احساس دلانے کے لیے سخت فیصلے ضروری ہیں۔انہوں نے دفاتر میں اے سی چلنے، اور وارڈز اور مریضوں کے اے سی بند ہونے پر برہمی کا اظہار کیا اور سرکاری ہسپتالوں میں کوڈ ریڈ اور کوڈ بلیو سسٹم نافذ کرنے کا حکم دیا۔