پشاور، معمولی تکرار پر باپ نے بیٹے اور بہو کو گولی مار کر قتل کردیا

پولیس نے لاشوں کو اسپتال منتقل کرکے واقعے کی تفتیش شروع کردی، علاقے میں سوگ کی فضاء

ہفتہ 5 جولائی 2025 22:42

پشاور(اُردو پوائنٹ اخبارتازہ ترین - این این آئی۔ 05 جولائی2025ء)تنگی کے علاقے گل آباد میں معمولی تکرار پر باپ نے بیٹے اور بہو کو گولی مار کر قتل کردیا۔پولیس کے مطابق خیبر پختونخوا کی تحصیل تنگی کے علاقے گل آباد میں خٹانوں کلے کے رہائشی باپ بیٹے میں معمولی تکرار کا افسوس ناک انجام سامنے آیا، جس میں باپ نے بیٹے اور بہو کو گولی مار کر قتل کردیا۔

اطلاع ملنے پر پولیس نے جائے وقوع پر پہنچ کر شواہد اور دیگر بیانات کی روشنی میں واقعے کی تحقیقات شروع کردی ہے۔پولیس کے مطابق تنگی گل آباد خٹانوں کلے کے رہائشی جہانگیر شاہ نے گھریلو جھگڑوں سے تنگ آ کر اپنے بیٹے سلطان شاہ اور بہو کو گولی مار کر قتل کر دیا۔ مقتول سلطان شاہ کے ماموں شاہزیب نے رپورٹ میں پولیس کو بتایاکہ میں گھر سے باہر کام میں مصروف تھا، اس دوران فون آیا کہ آپ کی بہن کے گھر میں جھگڑا ہے، میں فوراً گھر آیا تو میرے بہنوئی جہانگیر شاہ نے معمولی جھگڑے پر فائرنگ کر کے میرے بھانجے (اپنے بیٹی) سلطان شاہ اور اس کی بیوی کو گولی مار کر ہلاک کر دیا۔

(جاری ہے)

انہوں نے بتایا کہ پھر میں نے لاشوں کو پوسٹ مارٹم کے لئے تنگی ہیڈ کوارٹر اسپتال تنگی منتقل کیا۔پولیس نے جہانگیر شاہ کے خلاف دہرے قتل کا مقدمہ درج کر کے تفتیش شروع کردی ہے جب کہ ملزم واردات کے بعد فرار ہوگیا۔ واقعے کے بعد علاقے میں افسوس کی فضا ہے۔