پاکستان کو 32ویں ایشین جونیئر انفرادی سکواش چیمپئن شپ 2025 میں سات تمغے حاصل

ہفتہ 5 جولائی 2025 22:48

اسلام آباد (اُردو پوائنٹ اخبارتازہ ترین - این این آئی۔ 05 جولائی2025ء)پاکستان نے جنوبی کوریا میں ہونے والی 32ویں ایشین جونیئر انفرادی سکواش چیمپئن شپ 2025 میں کل سات تمغے حاصل کیے۔ایک پریس ریلیز کے مطابق پاکستان نے مین ایونٹ میں دو گولڈ میڈلز، دو سلور میڈلز، اور ایک برانز میڈل، اور پلیٹ ایونٹ میں دو گولڈ میڈلز جیتے ہیں۔ایم سہیل عدنان (انڈر 13) اور نعمان خان (انڈر 15) نے گولڈ میڈل جیتا، احمد ریان خلیل (انڈر 15) اور ماہنور علی (گرلز انڈر 13) نے چاندی کا تمغہ جیتا، اور عبداللہ نواز (انڈر 19) نے کانسی کا تمغہ حاصل کیا۔

پلیٹ ایونٹ میں یحییٰ خان (انڈر 17) اور ایم مصطفی (انڈر 13) نے گولڈ میڈل جیتے۔بوائز انڈر 15 میں نعمان خان (پاک) نے احمد ریان خلیل (پاک) کو 12-10، 11-6، 11-2 (3-0) سے شکست دی۔

(جاری ہے)

بوائز انڈر 13 میں محمد سہیل عدنان (پاک ) نے آیان دھنوکا (بھارت) کو 11-5، 11-2، 11-13، 11-6 (3-1) سے شکست دی۔گرلز انڈر 13 میں ین زیڈ (چائنا ) نے ماہ نور علی (پاک) کو 9-11، 11-6، 11-9، 9-11، 12-10 (3-2) سے شکست دی۔

پلیٹ ایونٹس میں بوائز انڈر 17، یحییٰ خان (پاک ) نے کوریا کے چنیانگ کے کو 11-9، 11-7 (2-0) سے شکست دی۔بوائز انڈر 13 میں محمد مصطفیٰ (پاک) نے ہانگ کانگ کے سی کیسی کو 11-3، 11-8 (2-0)سے شکست دی۔پاکستان سکواش فیڈریشن نے تمام تمغہ جیتنے والوں کو مبارکباد دیتے ہوئے کہا کہ پاکستان سکواش دوبارہ ٹریک پر آ گیا ہے اور میگا ایونٹس میں گولڈ میڈل جیتنا ایک بڑی کامیابی ہے۔ ہمیں اپنے نوجوان سکواش اسٹارز پر فخر ہے۔