معاونِ خصوصی وزیر اعلیٰ پنجاب برائے سیاسی امور ذیشان عاشق ملک کا نواز شریف انسٹیٹیوٹ آف کارڈیالوجی سرگودہا کا دورہ

ہفتہ 5 جولائی 2025 21:20

سرگودھا (اُردو پوائنٹ اخبارتازہ ترین - اے پی پی۔ 05 جولائی2025ء) معاونِ خصوصی وزیر اعلیٰ پنجاب برائے سیاسی امور ذیشان عاشق ملک نے ہفتہ کے روز نواز شریف انسٹیٹیوٹ آف کارڈیالوجی سرگودہا کا دورہ کیا۔ انہوں نے حال ہی میں فعال کیے گئے جدید او پی ڈی بلاک میں مریضوں کو فراہم کی جانے والی سہولیات اور Queue Management System بارے بریفنگ لی۔ معاونِ خصوصی کو انسٹیٹیوٹ کے مختلف شعبہ جات، ترقیاتی کاموں، سولر پارکنگ ایریا، اندرونی سڑکوں اور دیگر تعمیراتی حصوں بارے بھی بریف کیا گیا۔

اس موقع پر پرنسپل سرگودہا میڈیکل کالج ڈاکٹر وارث فروکہ اور پراجیکٹ ڈائریکٹر بھی موجود تھے، جنہوں نے جاری منصوبے کی رفتار، مشینری کی تنصیب، اور طبی سہولیات کے حوالے سے آگاہ کیا۔معائنہ کے دوران بات چیت کرتے ہوئے معاونِ خصوصی ذیشان عاشق ملک نے کہا کہ نواز شریف انسٹیٹیوٹ آف کارڈیالوجی وزیر اعلیٰ پنجاب مریم نواز شریف کی جانب سے سرگودہا کے عوام کے لیے ایک قیمتی تحفہ ہے۔

(جاری ہے)

یہ ادارہ نہ صرف سرگودہا بلکہ گرد و نواح کے اضلاع کے مریضوں کے لیے دل کے علاج کی جدید اور معیاری سہولیات فراہم کرے گا۔ وزیر اعلیٰ پنجاب خود جلد یہاں او پی ڈی کا باقاعدہ افتتاح کریں گی۔ انہوں نے ہسپتال کی تعمیر میں پیش رفت اور فراہم کی گئی سہولیات پر اطمینان کا اظہار کرتے ہوئے متعلقہ اداروں کو کام مزید تیز کرنے کی ہدایت کی۔اس موقع پر کمشنر سرگودہا ڈویژن جہانزیب اعوان اور ڈپٹی کمشنر سرگودہا کیپٹن (ر) محمد وسیم کے علاوہ دیگر افسران بھی ہمراہ تھے۔