صادق آباد، ضلع بھر میں 10 محرم الحرام کے 72 جلوس اور 14 مجالس برپا ہوں گی

اتوار 6 جولائی 2025 00:00

صادق آباد (اُردو پوائنٹ اخبارتازہ ترین - اے پی پی۔ 06 جولائی2025ء) پولیس سکیورٹی میں ضلع بھر میں 10 محرم الحرام کے 72 جلوس اور 14 مجالس برپا ہوں گی، 2400 پولیس افسران و اہلکار تعینات، 19 انتہائی حساس اور 20 حساس مقامات کی کڑی نگرانی کی جائے گی۔

(جاری ہے)

محرم الحرام کے پر امن انعقاد کے لیے ڈی پی او عرفان علی سموں کی قیادت میں پولیس ضلع بھر میں متحرک و پر عزم ہے، سرکل پولیس افسران و ایس ایچ اوز اپنی ٹیموں کے ساتھ سکیورٹی پلان و ایس او پی کے مطابق فرائض کی انجام دہی یقینی بنا رہے ہیں، ضلع بھر میں 10 محرم الحرام کے 72 جلوس اور 14 مجالس منعقد ہوں گی جن کی سکیورٹی کے لیے 2400 پولیس افسران و اہلکار تعینات کیے گئے ہیں، پولیس سکیورٹی کے لیے واک، تھرو گیٹ، میٹل ڈیٹیکٹرز، سنیفر ڈاگز، خار دار تاریں، آہنی جنگلے استعمال کرے گی جبکہ نگرانی کے لیے ڈرون، سی سی ٹی وی، کمانڈ اینڈ کنٹرول روم اور سیف سٹی کیمروں کو استعمال میں لایا جائے گا، جلوس کے راستوں اور مجالس کے مقامات کی جدید آلات سے سرچ اینڈ سوویپنگ کی جائے گی، جلوس و مجالس میں شرکت کرنے والے زائرین کی تلاشی ہو گی، ضلع بھر میں 19 انتہائی حساس و 20 حساس مقامات کی کڑی نگرانی کی جا رہی ہے جہاں پر اضافی نفری تعینات کی گئی ہے، کسی بھی ہنگامی صورت حال سے نمٹنے کے لیے رینجرز، ایلیٹ فورس اور پنجاب کانسٹیبلری کی اضافی نفری بھی طلب کی گئی ہے، جلوسوں کے راستے میں بلند عمارتوں پر سنائیپر تعینات کیے گئے ہیں جبکہ خفیہ نگرانی بھی کی جائے گی، 9 محرم الحرام کے روز ضلع بھر میں جلوس اور 39 مجالس کا انعقاد ہوا سکیورٹی ہائی الرٹ رہی اس سلسلہ میں گزشتہ روز ڈی پی او عرفان علی سموں نے ضلع کے مختلف علاقوں میں جلوس و مجالس کے دورے کرتے ہوئے سکیورٹی کا جائزہ لیا اور پولیس افسران کو اس متعلق ہدایات و احکامات جاری کیں۔