بھارت، خاتون کو ٹرین میں اجتماعی عصمت دری کا نشانہ بناکر پٹریوں پر پھینک دیاگیا

پیر 7 جولائی 2025 17:00

نئی دہلی(اُردو پوائنٹ اخبارتازہ ترین - این این آئی۔ 07 جولائی2025ء)بھارت میں اجتماعی عصمت دری کا ایک اور دل دہلا دینے والا واقعہ سامنے آیا ہے جس میں ریاست ہریانہ میں ایک 35سالہ خاتون کو سونی پت کے ریلوے اسٹیشن پر ٹرین کے اندر اجتماعی زیادتی کا نشانہ بنانے کے بعد پٹریوں پر پھینک دیا گیا جہاں وہ ایک اور ٹرین کی زد میں آگئی اورایک ٹانگ سے محروم ہوگئی۔

کشمیر میڈیا سروس کے مطابق متاثرہ خاتون کو سونی پت کے سول ہسپتال میں داخل کرایا گیا جہاں سے اسے روہتک کے ہسپتال منتقل کر دیا گیا۔ یہ معاملہ اس وقت سامنے آیا جب متاثرہ خاتوںنے ہسپتال کی ڈاکٹر کو واقعے کے بارے میں بتایا۔خاتون 24جون کو لاپتہ ہو گئی تھی۔ اس کے شوہر نے 26جون کو پولیس سٹیشن میں گمشدگی کی رپورٹ درج کرائی۔

(جاری ہے)

25جون کی رات کچھ لوگوں نے خاتون کو ہندو کالج کے قریب پٹریوں پر زخمی حالت میں دیکھا، انہوں نے اسے سول اسپتال میں داخل کرایا۔

بعد میں اسے روہتک اسپتال منتقل کیا گیا۔قلعہ پولیس اسٹیشن کے ایس ایچ او نے بتایا کہ ڈاکٹروںنے پولیس کو اجتماعی زیادتی کے بارے میں بتایا جس کے بعد ایک ٹیم نے اسپتال کا دورہ کیا اور خاتون کا بیان ریکارڈ کیا۔ ایس ایچ او نے کہاکہ متاثرہ خاتون نے بتایا کہ ریلوے اسٹیشن پر ٹرین کے ڈبے میں تین افراد نے اس کی اجتماعی عصمت دری کی۔