پنجاب حکومت کا ہسپتالوں میں دوران ڈیوٹی نرسز اور اسٹاف کے موبائل فون استعمال پرپابندی کا فیصلہ

پیر 7 جولائی 2025 22:20

لاہور(اُردو پوائنٹ اخبارتازہ ترین - این این آئی۔ 07 جولائی2025ء)پنجاب حکومت نے ہسپتالوں میں دوران ڈیوٹی نرسز اور پیرا میڈیکل سٹاف کے موبائل فون کے استعمال پر پابندی کا فیصلہ کیا ہے۔تفصیلات کے مطابق وزیراعلیٰ پنجاب مریم نواز کی زیر صدارت اجلاس ہواجس میں سی ایم ہیلتھ ویجی لینس ا سکواڈ کے قیام کا اصولی فیصلہ کیا گیا۔اجلاس میں فیصلہ ہوا کہ ڈیوٹی کے دوران نرسز اورپیرا میڈیکل سٹاف کیلئے موبائل فون کے استعمال پر بھی پابندی ہوگی۔

(جاری ہے)

وزیر اعلیٰ نے ہسپتالوں میں موبائل فون کے بجائے رابطے کیلئے پیجر سسٹم نافذ کرنے کا حکم بھی دیا۔ مریم نواز نے 2روز کے اندر ہسپتالوں میں ریڈ اور بلیو کوڈ ایمرجنسی سسٹم نافذ کرنے کا حکم دے دیا۔انہوں نے ہر ٹیچنگ اور ڈسٹرکٹ ہسپتال میں وینٹی لیٹر مہیا کرنے کی ہدایت کرتے ہوئے کہا کہ ہارٹ کنسلٹنٹ اور سرجن ہفتے میں 2بار ڈسٹرکٹ اسپتالوں میں ڈیوٹی دیں گے، مریضوں کو علاج کیلئے دوسرے شہر جانے کا کہنا ظلم ہے، اب ایسے نہیں ہوگا ۔ انہوں نے ہسپتالوں کے ایکوپمنٹ آڈٹ، ڈیتھ آڈٹ، لیب آڈٹ، نرسنگ آڈٹ اور ریکارڈ آڈٹ کی ہدایت کی اور کہا کہ چیف ایگزیکٹو آفیسر اور ایم ایس کی تعیناتی کے لیے سیکرٹری ہیلتھ خود انٹرویو لیں ۔