میانمار‘ جھڑپوں میں شدت آنے کے بعد ہزاروں مہاجرین بھارت میں داخل

منگل 8 جولائی 2025 22:47

ینگون(اُردو پوائنٹ اخبارتازہ ترین - آن لائن۔ 08 جولائی2025ء)میانمار میں دو مخالف مسلح گروپس کے درمیان جھڑپوں کے بعد ہزاروں مہاجرین بھارت کی شمال مشرقی ریاست میزورم میں داخل ہو گئے ہیں۔بھارتی میڈیا کے مطابق ایک سینئر سیکیورٹی اہلکار کا کہنا ہے کہ ان افراد کی آمد کا آغاز 2 جولائی کو دو حریف چِن نیشنل ڈیفنس فورس (سی ڈی این ایف) اور چِن لینڈ ڈیفنس فورس- وانگوریم (سی ڈی ایف - ایچ) کے درمیان میانمار کی شمال مغربی ریاست چِن میں اسٹریٹجک علاقوں کا کنٹرول حاصل کرنے کے لیے شروع ہونے والی جھڑپوں کے بعد ہوا۔

اُنہوں نے میڈیا پر اپنا نام ظاہر نہ کیے جانے کی شرط پر بتایا کہ تنازع شروع ہونے کے بعد سے تقریباً 4 ہزار مہاجرین میزورم میں داخل ہو چکے ہیں۔اہلکار نے مزید بتایا کہ اتوار کی رات تک حکام نے چمپائی ضلع کے 2 دیہات زوکھاوتھر اور سائکھمفائی میں 3 ہزار 980 افراد کی آمد کا اندراج کیا تھا۔

(جاری ہے)

اُنہوں نے کہا کہ یہ ایک عارضی نمبرز ہیں جو تبدیل بھی ہوسکتے ہیں، ابتدائی طور پر میانمار سے بہت کم لوگ آئے تھے لیکن جوں جوں لڑائی میں شدت آتی گئی تو زیادہ لوگ آنے لگے۔

واضح رہے کہ میزورم کی سرحد میانمار کے ان علاقوں کے ساتھ ملتی ہے جن پر چِن گروپس کا کنٹرول ہے، بھارتی ریاست کے چِن کے لوگوں کے ساتھ گہرے تعلقات ہیں اور یہ 2021ء میں فوجی بغاوت شروع ہونے کے بعد سے چِن کے دسیوں ہزاروں مہاجرین کی پناہ گاہ ہے۔اُنہوں نے بتایا کہ لڑائی ہمارے قابو سے باہر ہے، لوگ ہجرت کرکے آ گئے ہیں اور انسانی بنیادوں پر ہمیں اُنہیں پینے کا پانی، خوراک اور پناہ گاہ فراہم کرنی ہے۔