کراچی،ڈیفنس فیز 6 فلیٹ سے شوبز سے وابستہ خاتون کی لاش برآمد

خاتون گھر میں اکیلی رہتی تھیں اور2018 سے فلیٹ کرایے میں لیا ہوا تھا، پولیس حکام

منگل 8 جولائی 2025 21:50

کراچی(اُردو پوائنٹ اخبارتازہ ترین - این این آئی۔ 08 جولائی2025ء)کراچی پوش علاقے ڈیفنس فیز 6 اتحاد کمرشل میں واقع فلیٹ سے خاتون کی لاش برآمد ہوئی ہے، پولیس نے کارروائی کے لیے لاش اسپتال منتقل کردی ہے۔ایس ایچ او گذری فاروق سنجرانی نے بتایا کہ ڈیفنس فیز 6 اتحاد کمرشل لین نمبر 5 میں قائم رہائشی عمارت کی تیسری منزل کے فلیٹ سے خاتون کی لاش ملی جو تقریبا 20 سے 25 دن پرانی تھی، خاتون کی شناخت 35 سالہ حمیرا اصغر علی کے نام سے کی گئی جس کا تعلق شوبز تھا اور وہ مذکورہ فلیٹ میں اکیلی ہی رہائش پذیر تھی۔

انہوں نے بتایا ابتدائی تحقیقات میں معلوم ہوا ہے کہ متوفیہ حمیرا اصغر علی مذکورہ فلیٹ میں 2018 سے کرائے پر رہائش پذیر تھیں اور 2024 سے انہوں نے کرایہ دینا بند کر دیا تھا جس کے بعد مالک مکان نے عدالت سے رجوع کیا تھا۔

(جاری ہے)

انہوں نے کہاکہ عدالت کے حکم پر فلیٹ خالی کرانے کے لیے بیلف نے پولیس سے رابطہ کیا اور اس کے بعد پولیس ان کے ہمراہ فلیٹ پر پہنچی تو فلیٹ کا دروازہ اندر سے بند تھا جس سے توڑ کر اندر گئے تو خاتون کی تعفن زدہ لاش کمرے میں پڑی ملی، جس پر کرائم سین یونٹ کو طلب کر کے شواہد حاصل کیے گئے۔

ایس ایچ او نے بتایا کہ خاتون کی لاش کو ضابطے کی کارروائی کے لیے جناح اسپتال منتقل کر دیا گیا جبکہ پولیس نے مذکورہ فلیٹ کو سیل بھی کر دیا ہے۔فاروق سنجرانی نے مزید بتایا کہ فلیٹ کا دروازہ اندر سے بند تھا جبکہ فوری طور پر ہلاکت کی وجہ معلوم نہیں ہو سکی تاہم شبہ ہے کہ خاتون کی ہلاکت طبعی طور پر ہوئی ہو، خاتون کا پوسٹ مارٹم کرایا جائے گا جس کی رپورٹ آنے کے بعد ہی وجہ موت کا حتمی تعین کیا جا سکے گا۔انہوں نے کہاکہ پولیس کا متوفیہ کے کسی بھی رشتے دار سے کوئی رابطہ نہیں ہوا اور اس حوالے سے پولیس مزید تحقیقات کر رہی ہے۔