آ ئی این ایس پی اے ڈی کی اقوام متحدہ سے جھوٹے مقدمات میں نظر بند کشمیری قیادت کی رہائی کےلئے کردار کی اپیل

بدھ 9 جولائی 2025 17:04

اسلام آباد (اُردو پوائنٹ اخبارتازہ ترین - اے پی پی۔ 09 جولائی2025ء) انسانی حقوق، مذہبی ہم آہنگی اور عالمی امن کے لیے سرگرم ایک سرکردہ تنظیم انسٹی ٹیوٹ آف پیس اینڈ ڈویلپمنٹ (آ ئی این ایس پی اے ڈی ) کے صدر ڈاکٹر محمد طاہر تبسم نے اقوام متحدہ کے سیکرٹری جنرل انتونیو گوتریش اور ہائی کمشنر برائے انسانی حقوق ڈاکٹر جاسم محمد المطہری پر زور دیا ہے کہ جھوٹے مقدمات میں نظر بند کشمیری قیادت کی رہائی کےلئے کردار ادا کریں۔

کشمیر میڈیاسروس کے مطابق ڈاکٹر محمد طاہر تبسم نے اپنے ایک خط میں نظر بند کشمیری قیادت کو طبی اور دیگر بنیادی سہولیات کی عدم دستیابی کا ذکر کرتے ہوئے کہا کہ اکثر نظر بندوں کی صحت انتہائی گرچکی ہے۔ انہوں نے سیکرٹری جنرل اور ہائی کمشنر پر زور دیا کہ وہ نظر بندوں کی غیر مشروط رہائی کے لیے اپنا اثر ورسوخ استعمال کریں۔

(جاری ہے)

انہوں نے کہا کہ کشمیری نظر بندوں کو بھارتی جیلوں میں انتہائی مشکلات حالات کا سامنا ہے ، دفعہ 370کی منسوخی کے بعد سیاسی نظربندوں کے ساتھ ناروا سلوک میں تیزی آئی ہے۔

انہوں نے کہا کہ مودی حکومت نے عدلیہ کو بھی اپنے تابع فرمان کر رکھا ہے لہذا نظر بندوں کو انصاف نہیں مل رہا۔طاہر تبسم نے کہا کہ کل جماعتی حریت کانفرنس کے چیئرمین مسرت عالم بٹ، محمد یاسین ملک، شبیر احمد شاہ، آسیہ اندرابی فاروق احمد ڈار اور دیگر رہنما دہلی کی بدنام زمانہ تہاڑ جیل میں قید ہیں اور انہیں طبی سہولیات تک رسائی نہیں ۔انہوں نے کہا کہ یہ مسئلہ اقوام متحدہ ، انسانی حقوق کونسل اور عالمی برادری کی فوری توجہ کا متقاضی ہے۔