محسن نقوی اور اعصام الحق کی ملاقات، اسلام آباد میں نئے ٹینس کورٹس بنانے پر اتفاق

بدھ 9 جولائی 2025 22:54

لاہور (اُردو پوائنٹ اخبارتازہ ترین - آن لائن۔ 09 جولائی2025ء) چئیرمین پاکستان کرکٹ بورڈ (پی سی بی) محسن نقوی سے صدر پاکستان ٹینس فیڈریشن اعصام الحق قریشی نے ملاقات کی۔ ملاقات میں اسلام آباد میں ٹینس کورٹس کی کمی اور موجودہ سہولیات سے متعلق مسائل پر تفصیلی گفتگو ہوئی۔اعصام الحق نے چئیرمین پی سی بی کو اسلام آباد میں ٹینس کورٹس کے فقدان سے آگاہ کیا اور کھیل کے فروغ میں درپیش رکاوٹوں پر روشنی ڈالی۔

اس موقع پر محسن نقوی نے فوری اقدامات کی یقین دہانی کراتے ہوئے متعلقہ حکام کو مسائل کے حل کی ہدایت دی اور اعلان کیا کہ اسلام آباد میں نئے ٹینس کورٹس تعمیر کیے جائیں گے۔محسن نقوی کا کہنا تھا کہ ''کرکٹ کی طرح پاکستان میں ٹینس کا بھی بے پناہ ٹیلنٹ موجود ہے، ہم چاہتے ہیں کہ ٹینس میں بھی نوجوان بین الاقوامی سطح پر ملک کا نام روشن کریں۔

(جاری ہے)

انہوں نے مزید کہا کہ ''پیڈل ٹینس جیسے نئے کھیل نوجوانوں میں مقبول ہو رہے ہیں، ان کھیلوں کے فروغ کے لیے بھی مکمل سپورٹ فراہم کی جائے گی۔چئیرمین پی سی بی نے پاکستان ٹینس فیڈریشن کو ہر ممکن تعاون کی یقین دہانی کراتے ہوئے کہا کہ ادارے کے وسائل ٹینس کے فروغ کے لیے بھی استعمال کیے جائیں گے۔صدر پاکستان ٹینس فیڈریشن اعصام الحق قریشی نے پاکستان میں آئی سی سی چیمپئنز ٹرافی 2025 کے کامیاب انعقاد پر محسن نقوی کو مبارکباد دی اور کرکٹ کے فروغ کے لیے ان کی کاوشوں کو سراہا۔ انہوں نے ٹینس کورٹس کے مسائل حل کرنے کی یقین دہانی پر بھی چئیرمین پی سی بی کا شکریہ ادا کیا۔ملاقات کے دوران چیف آپریٹنگ آفیسر پی سی بی، سمیر احمد بھی موجود تھے۔