فاطمہ جناح باہمت، بااصول اور بلند حوصلہ شخصیت کی مالک تھیں، سردار ایاز صادق

بدھ 9 جولائی 2025 20:20

اسلام آباد (اُردو پوائنٹ اخبارتازہ ترین - این این آئی۔ 09 جولائی2025ء)سپیکر قومی اسمبلی سردار ایاز صادق نیمادر ملت محترمہ فاطمہ جناح کو خراج عقیدت پیش کرتے ہوئے کہا ہے کہ وہ ایک باہمت، بااصول اور بلند حوصلہ شخصیت کی مالک تھیں۔ ان خیالات کا اظہار انہوں نے محترمہ فاطمہ جناح کی 58 ویں برسی کے موقع پر پیغام میں کیا۔

(جاری ہے)

سپیکر قومی اسمبلی نے کہا کہ مادر ملت کا کردار خواتین کے لیے عزم، حوصلے اور رہنمائی کا سر چشمہ ہے، وہ قائداعظم محمد علی جناح کی جان نثار اور دست راست بہن تھیں، تحریک آزادی کے ہر مرحلے میں محترمہ فاطمہ جناح قائداعظم کے شانہ بشانہ رہیں۔

سپیکر قومی اسمبلی نے کہا کہ محترمہ فاطمہ جناح خواتین کی تحریک آزادی کی صف اول کی رہنما تھیں، قیام پاکستان کے بعد محترمہ فاطمہ جناح نے عملی سیاست میں بھرپور کردار ادا کیا، فاطمہ جناح عوام بالخصوص خواتین کی فلاح و بہبود کے لیے ہمیشہ سرگرم رہیں۔ انہوں نے کہا کہ محترمہ فاطمہ جناح کی قومی خدمات کو تاریخ میں یاد رکھا جائے گا۔سپیکر قومی اسمبلی نے اللہ تعالی سے مادر ملت محترمہ فاطمہ جناح کے درجات کی بلندی کے لیے دعا کی۔