علی امین اور بیرسٹر سیف کے کارناموں کا انجام بھی ’’ نیکسٹ سٹاپ اڈیالہ‘‘ ہی نظر آرہا ہے

جس 10 کھرب کی آڈٹ رپورٹ کا یہ ڈھنڈورا پیٹ رہے وہ بزدار اور پرویزالٰہی دور کی ہے، پوری قوم جانتی ہے کہ 2018 سے 2023 تک پنجاب میں کس کی حکومت تھی۔ وزیراطلاعات پنجاب عظمیٰ بخاری کا ردعمل

ثنااللہ ناگرہ بدھ 9 جولائی 2025 20:39

علی امین اور بیرسٹر سیف کے کارناموں کا انجام بھی ’’ نیکسٹ سٹاپ اڈیالہ‘‘ ..

لاہور ( اردوپوائنٹ اخبار تازہ ترین۔ آئی پی اے ۔ 09 جولائی 2025ء ) وزیراطلاعات پنجاب عظمیٰ بخاری نے کہا ہے کہ چار سال پنجاب میں کرپشن، نااہلی اور لوٹ مار کا سیاہ ترین دور تھا۔ وزیراطلاعات پنجاب عظمی بخاری نے مشیر اطلاعات خیبر پختونخوا بیرسٹر سیف کے بیان پر ردعمل دیتے ہوئے کہا کہ مسٹرجعلی دانشور آڈٹ رپورٹ غور سے پڑھیں اس میں پی ٹی آئی قیادت کا کچا چٹھا ہے، جس آڈٹ رپورٹ کا آپ لوگ ڈھنڈورا پیٹ رہے وہ رپورٹ بزدار اور پرویز الٰہی دورکی ہے۔

عظمیٰ بخاری نے کہا کہ آڈٹ رپورٹ کا صفحہ نمبر 87 اور صفحہ نمبر 96 پڑھ لیں شاید آپ کو تھوڑی سی شرم آجائے، جس 10کھرب کا آپ واویلا کررہے ہیں وہ 2018 سے 2023 کی گندم خریداری اور سبسڈی کا ہے، 2018 سے 2023 تک پنجاب میں کس کی حکومت تھی پوری قوم جانتی ہے۔

(جاری ہے)

صوبائی وزیر اطلاعات نے مزید کہا کہ چار سال پنجاب میں کرپشن، نااہلی اور لوٹ مار کا سیاہ ترین دور تھا، 12سال سے جو لوٹ مار خیبرپختونخوا میں ہو رہی ہے چار سال پنجاب میں وہی لوٹ مار ہوئی، ان چار سالوں میں بشری بی بی اور فرح گوگی کے ڈاکے اور چوریاں بھی ریکارڈ کا حصہ ہیں۔

عظمیٰ بخاری نے کہا کہ شریف فیملی کے بغض میں آپ کا لیڈر وزیراعظم ہاس سے ڈائری اٹھا کر اڈیالہ پہنچ گیا، علی امین اور بیرسٹر سیف کے کارناموں کا انجام بھی ’’نیکسٹ سٹاپ اڈیالہ‘‘ ہی نظر آرہا ہے۔ یاد رہے اس سے قبل مشیر اطلاعات خیبرپختونخواہ بیرسٹر ڈاکٹر سیف نے پنجاب حکومت پر الزام عائد کیا کہ پنجاب حکومت تاحال 10 کھرب روپے کی سنگین مالی بے ضابطگیوں کا جواب دینے سے قاصر ہے۔

انہوں نے اپنے ردعمل میں کہا کہ آڈٹ رپورٹ پر خاموشی پنجاب میں جاری لوٹ مار اور کرپشن کا واضح ثبوت ہے، آڈٹ رپورٹ نے مریم نواز کی کرپشن پر مہرِ تصدیق ثبت کر دی ہے، مریم نواز پنجاب کے عوام کے 10 کھرب روپے ڈکار گئی ہیں، پنجاب میں ترقیاتی منصوبے عوامی فلاح کے بجائے صرف کمیشن کے لیے شروع کیے جاتے ہیں، پنجاب کے عوام کو 10 کھرب روپے کا ٹیکہ لگا کر ٹک ٹاک پر ترقی کے جھوٹے دعوے کیے جا رہے ہیں، 10 کھرب روپے کا اسکینڈل تو صرف آڈٹ رپورٹ میں سامنے آیا ہے، باقی کرپشن اس کے علاوہ ہے، یہ تو صرف پہلے سال کی کہانی ہے، آگے آگے دیکھئے ہوتا ہے کیا۔

کرپشن شریف خاندان کی رگ رگ میں بس چکی ہے، شریف خاندان پنجاب کے عوام کا پیسہ لندن منتقل کر رہا ہے،یہ خاندان گزشتہ کئی برسوں سے ملک کو لوٹ رہا ہے، مگر ان کا پیٹ ہے کہ بھرتا ہی نہیں، جب عوام نے ووٹ کے ذریعے مسترد کیا تو فارم 47 کے ذریعے ملک پر مسلط ہوئے، شریف خاندان عوام کا پیچھا چھوڑنے کو تیار نہیں۔