آئل سپلائی چین کا شعبہ ڈیجیٹائز کرنے کے دوسرے مرحلے کا آغاز ہوگیا

بدھ 9 جولائی 2025 20:50

اسلام آباد (اُردو پوائنٹ اخبارتازہ ترین - این این آئی۔ 09 جولائی2025ء)پاکستان کے آئل سپلائی چین کے شعبے کو ڈیجیٹائز کرنے کے دوسرے مرحلے کا آغاز کر دیا گیا۔آئل اینڈ گیس ریگولیٹری اتھارٹی کے اعلامئے کے مطابق اوگرا نے باضابطہ طور ایک جامع ٹریک اینڈ ٹریس سسٹم تیار کر لیا ہے۔

(جاری ہے)

اوگرا کے مطابق ٹریک اینڈ ٹریس سسٹم پنجاب انفارمیشن ٹیکنالوجی بورڈ کے تعاون سے متعارف کروایا گیا ہے، ڈیجیٹل نظام میں ای آر پی پلیٹ فارمز، جی پی ایس ٹریکنگ اور مرکزی ڈیش بورڈز استعمال ہو گا۔

اوگرا کے ترجمان عمران غزنوی کے مطابق پیٹرولیم مصنوعات کی ترسیل کے مکمل نظام کو ڈیجیٹل بنایا جا رہا ہے، اب تک 29 سے زائد او ایم سیز، ای آر پی سسٹمز پر منتقل کر دیے گئے۔ ترجمان اوگرا کے مطابق تقریبا 15 ہزار آئل ٹینکرز جی پی ایس ٹریکرز سے لیس کیے جا چکے ہیں، اس سسٹم کے ذریعے ایندھن کی ترسیل کی بروقت نگرانی ہو سکے گی۔انہوں نے کہا کہ اس سسٹم کے ذریعے ایندھن کی اسمگلنگ کی روک تھام ممکن ہو سکے گی۔