ًبانی کی رہائی ، چوری مینڈیٹ کی واپسی پی ٹی آئی کے اولین مطالبات ہیں ، علی محمد خان

ةپارٹی صرف بانی کی ہدایت پر چلے گی ، عمران خان نے پرامن احتجاج کی تیاریوں کا عندیہ دے دیا ہے رجیم چینج کے وقت جنہوں نے پارٹی کو چھوڑا، انہوں نے دراصل بہت بڑا دھوکا دیا ہے ، رہنما پی ٹی آئی

بدھ 9 جولائی 2025 22:45

Q اسلام آباد(اُردو پوائنٹ اخبارتازہ ترین - آن لائن۔ 09 جولائی2025ء)تحریک انصاف کے رہنما علی محمد خان نے کہا ہے کہ پارٹی بانی کی رہائی اور مینڈیٹ کی واپسی اولین مطالبات ہیں اور پی ٹی آئی بانی کی ہدایت پر ہی چلے گی،نہوں نے ملک گیر پرامن احتجاج کی تیاریوں کا عندیہ دے دیا ہے ۔ میڈیا سے گفتگو کرتے ہوئے علی محمد خان نے کہا کہ پی ٹی آئی اور بانی پارٹی ایک ہی پیج پر ہیں اور تحریک انصاف بانی کی ہدایات کے مطابق ہی چلے گی۔

ان کا کہنا تھا کہ پارٹی کے سب سے بڑے رہنما اس وقت سب سے بڑی قربانی دے رہے ہیں۔علی محمد خان نے کہا کہ پارٹی میں احتجاج کی تیاریاں جاری ہیں اور پرامن احتجاج کو ملک بھر میں پھیلانے کا ارادہ ہے۔ ان کے بقول احتجاج کا مقصد معنی خیز مذاکرات کی راہ ہموار کرنا ہے، تاہم اگر بات چیت کا راستہ بند رہا تو سڑکوں پر آنے کا آپشن موجود ہے۔

(جاری ہے)

انہوں نے کہا کہ ہمارا پہلا نعرہ بانی پی ٹی آئی کی رہائی ہے، دوسرا مطالبہ مینڈیٹ کی واپسی ہے، جبکہ تمام اسیران کی رہائی بھی ایجنڈے میں شامل ہے۔

علی محمد خان کا کہنا تھا کہ عوام نے ایک لیڈر کو منتخب کیا، لیکن ان کے مینڈیٹ کو چرا لیا گیا۔انہوں نے موجودہ حکومت کو تنقید کا نشانہ بناتے ہوئے کہا کہ مہنگائی سے عوام کی کمر ٹوٹ گئی ہے اور یہ حکومت وہ ہے جو اپنی نشستیں ہارنے کے باوجود اقتدار میں ہے۔ ان کا کہنا تھا کہ خیبرپختونخوا کے ساتھ ساتھ پنجاب نے بھی سب سے زیادہ قربانیاں دی ہیں اور فسطائیت کا سب سے زیادہ شکار پنجاب ہی ہوا ہے۔علی محمد خان نے کہا کہ جب پنجاب نکلے گا تو بانی پی ٹی آئی بھی نکلیں گے اور رجیم چینج کے وقت جنہوں نے پارٹی کو چھوڑا، انہوں نے دراصل دھوکہ دیا۔ ان کا کہنا تھا کہ بانی پی ٹی آئی کے بچوں کو پاکستان آنے کا پورا حق حاصل ہے۔