سینٹ کٹس اینڈ نیوس میں پاکستان کا پہلا ہائی کمشنر تعینات، اسناد ریاستی سربراہ کو پیش

محمد سلیم کو کینیڈا کے ساتھ ساتھ سینٹ کٹس اینڈ نیوس میں بھی پاکستان کا ہائی کمشنر تعینات کردیا گیا ہے

جمعرات 10 جولائی 2025 12:00

اوٹاوا (اُردو پوائنٹ اخبارتازہ ترین - این این آئی۔ 10 جولائی2025ء)پاکستان نے کینیڈا میں اپنے ہائی کمشنر محمد سلیم کو جنوری 2024 میں سفارتی تعلقات قائم ہونے والے ملک سینٹ کٹس اور نیوس میں اپنا پہلا ہائی کمشنر تعینات کردیا، جنہوں نے اپنی اسناد میزبان ملک کے سربراہ کو پیش کردیا۔کینیڈا میں پاکستان کے ہائی کمیشن سے جاری اعلامیے کے مطابق بیسیٹرے میں گورنمنٹ ہاس میں منعقدہ تقریب میں محمد سلیم نے پاکستان کے ہائی کمشنر کی حیثیت میں اپنی دستاویزات سینٹ کرسٹوفر (سینٹ کٹس)اور نیوس کی گونر جنرل ڈیم مارسیلا کو پیش کیں۔

تقریب کے دوران پاکستانی ہائی کمشنر محمد سلیم نے پاکستانی قیادت اور عوام کی جانب سے سینٹ کیٹس اور نیوز کی گورنر اور عوام کو خیرسگالی کا پیغام پہنچایا اور دونوں ممالک کے درمیان تعلقات کو مضبوط بنانے کے عزم کا اعادہ کیا۔

(جاری ہے)

پاکستانی ہائی کمشنر نے اس موقع پر باہمی تعاون میں اضافے سے دو طرفہ فواد کو اجاگر کیا۔کینیڈا کے دارالحکومت اوٹاوا میں ہائی کمشنر محمد سلیم کو بیک وقت سینٹ کٹس اور نیوز کا نان ریذیڈنٹ ہائی کمشنر کا منصب دیا گیا ہے۔

پاکستان اور سینٹ کٹس اینڈ نیوز کے سفارتی تعلقات جنوری 2024 میں قائم ہوئے ہیں اور محمد سلیم یہاں تعینات ہونے والے پہلے پاکستانی سفیر ہیں۔انہوں نے تازہ قائم ہونے والے سفارتی تعلقات کو مضبوط بنانے اور سیاسی، تجارتی، سرمایہ کاری، ترقی اور سیاحت سمیت دیگر شعبوں میں مشترکہ تعاون بڑھانے کے لیے اپنے عزم کا اظہار کیا۔اعلامیے میں کہا گیا کہ پاکستانی ہائی کمشنر کی جانب سے اسناد پیش کرنا دونوں ممالک کے درمیان تعلقات کا تاریخی سنگ میل ہے اور آنے والے برسوں میں تعاون مضبوط بنانے کے لیے راہ ہموار کرنے کی علامت ہے۔