سرپلس ایل این جی کھپانے کیلئے گھریلو گیس کنکشن پر پابندی اٹھانے پر غور

نئے گھریلو گیس کنکشنز کی 35 لاکھ سے زائد درخواستیں زیر التواء ہیں‘ذرائع

جمعرات 10 جولائی 2025 18:40

لاہور(اُردو پوائنٹ اخبارتازہ ترین - این این آئی۔ 10 جولائی2025ء)وزارت پیٹرولیم نے سرپلس ایل این جی کھپانے کے لیے گھریلو گیس کنکشن پر پابندی اٹھانے پر غور شروع کردیا۔ذرائع وزارت پیٹرولیم کے مطابق پابندی ہٹانے سے گیس پریشر اور درآمدی لاگت پر اسسٹڈی شروع کردیا گیا، قطر کے ساتھ ایل این جی درآمد کا معاہدہ 2030میں ختم ہورہا ہے، معاہدہ ختم ہونے کے بعد ہرسال 4ارب ڈالر کی ایل این جی منگوانا پڑے گی، درآمدی ایل این جی کا خرچہ گھریلو کنکشز سے پورا ہونے سے متعلق اسٹڈی جاری ہے۔

ذرائع کے مطابق گھریلو صارفین کا ٹیرف 1800 اور درآمدی ایل این جی کا 3500ایم ایم سی ایف ڈی ہے، سردیوں میں درآمدی ایل این جی گھریلو صارفین کو دینے سے 250 ارب روپے کا نقصان ہوتا ہے۔پاور سیکٹر کی طلب کم ہونے کے باعث درآمدی ایل این جی سرپلس ہوگئی، سرپلس ایل این جی کے باعث مقامی گیس کی پیداوار روکنا پڑتی ہے، گیس پائپ لائنز پھٹنے سے بچانے کیلئے مقامی پیداوار روکنا پڑتی ہے۔

(جاری ہے)

ایل این جی سرپلس ہونے کے باعث حکومت 5 کارگوز موخر بھی کرچکی۔کم ریکوری اور گیس کی قلت کے باعث گھریلو کنکشنز پر 2019میں پابندی لگائی گئی،300 ایم ایم سی ایف ڈی سے 40 لاکھ صارفین کو نئے کنکشز مل سکتے ہیں۔ اس وقت نئے گھریلو گیس کنکشنز کی 35 لاکھ سے زائد درخواستیں زیر التوا ء ہیں۔ذرائع وزارت پیٹرولیم کے مطابق پابندی اٹھائی گئی تو سیکیورٹی جمع کرانے والے 3لاکھ صارفین ترجیج ہوں گے، اسٹدی مکمل ہونے کے بعد وفاقی کابینہ کو سمری بھیجی جائے گی ، وفاقی کابینہ ہی گھریلو گیس کنکشنز پر سے پابندی ہٹانے کا فیصلہ کرے گی۔