رانا احسان افضل کی ٹیکسٹائل اور قالین بافی کی صنعت کے نمائندوں سے ملاقات، مختلف امورپر غور

جمعرات 10 جولائی 2025 18:57

اسلام آباد (اُردو پوائنٹ اخبارتازہ ترین - این این آئی۔ 10 جولائی2025ء)وزیر اعظم کے معاون خصوصی برائے تجارت رانا احسان افضل خان نے اسلام آباد میں وزارت تجارت میں آل پاکستان ٹیکسٹائل ملز ایسوسی ایشن (اے پی ٹی ایم ای) اور پاکستان کارپٹ مینوفیکچررز اینڈ ایکسپورٹرز ایسوسی ایشن کے وفود کے ساتھ ایک اہم ملاقات کی۔ جمعرات کو جاری پریس ریلیز کے مطابق اے پی ٹی ایم اے کے نمائندوں نے معاون خصوصی کو کاروبار کی بڑھتی ہوئی لاگت ، خاص طور پر علاقائی حریفوں کے مقابلے میں ٹیکسٹائل کے شعبے کو درپیش توانائی کے بڑھتے ہوئے نرخوں سے آگاہ کیا۔

انہوں نے پاکستان کی برآمدات کے سنگ بنیاد کے طور پر ٹیکسٹائل انڈسٹری کی اہمیت کو اجاگر کیا۔ رانا احسان افضل خان نے ٹیکسٹائل کے اسٹیک ہولڈرز کو تجارتی ماحول کو بہتر بنانے میں وزارت کی طرف سے مکمل تعاون کی یقین دہانی کرائی۔

(جاری ہے)

انہوں نے اس امید کا بھی اظہار کیا کہ وزارت کی سربراہی میں امریکا کے ساتھ جاری ٹیرف مذاکرات پاکستان کے برآمد کنندگان کے لیے مثبت نتائج کا باعث بنیں گے۔

ملاقات کے دوران پاکستان کارپٹ مینوفیکچررز اینڈ ایکسپورٹرز ایسوسی ایشن کے وفد نے ویلیو ایڈڈ قالینوں کی تیاری کے لیے ضروری انٹرمیڈیٹ اشیا پر زیادہ ٹیکس لگانے پر تشویش کا اظہار کیا۔ انہوں نے اس بات پر زور دیا کہ ٹیکس کے بوجھ قالین کی صنعت کی ترقی اور برآمدی صلاحیت کو محدود کر رہے ہیں۔رانا احسان افضل نے ان مسائل کو حل کرنے کے لیے متعلقہ حکام کے ساتھ فعال طور پر مشغول ہونے کے لیے وزارت تجارت کے عزم کا اعادہ کیا اور وفود کو یقین دلایا کہ برآمدی شعبوں کو سہولت فراہم کرنا حکومت کی اولین ترجیح ہے۔