بابر اعظم سے وکٹ کیپنگ کے حوالے سے کوئی بات نہیں ہوئی، قومی ٹیم کے ہیڈ کوچ کا اہم بیان

کسی بیٹر کو یہ نہیں کہا کہ 150 کے سٹرائیک ریٹ سے کھیلیں، اگر ہم ٹی 20 میں پیچھے ہیں اسکی وجہ ہماری بیٹنگ ، مارڈرن ڈے کرکٹ میں آپکو تیز کھیلنا ہوتا ہے : مائیک ہیسن

ذیشان مہتاب جمعہ 11 جولائی 2025 12:12

بابر اعظم سے وکٹ کیپنگ کے حوالے سے کوئی بات نہیں ہوئی، قومی ٹیم کے ہیڈ ..

لاہور (اردو پوائنٹ تازہ ترین اخبار ۔ 11 جولائی 2025ء ) پاکستان کرکٹ ٹیم کے ہیڈ کوچ مائیک ہیسن کا کہنا ہے کہ بابر اعظم سے وکٹ کیپنگ کے حوالے سے کوئی بات نہیں ہوئی، وہ بطور اوپنر ٹیم میں جگہ بنانے کیلئے کام کررہے ہیں، اگر وہ ٹیم میں جگہ بنائیں گے تو صائم یا فخر کے ساتھ کھیلیں گے۔

نیشنل بینک اسٹیڈیم کراچی میں میڈیا سے گفتگو کرتے ہوئے قومی ٹیم کے ہیڈ کوچ کا کہنا تھا کہ ٹی 20 کرکٹ سیریز کے سلسلے میں کیمپ لگایا گیا ہے۔

کچھ چیزوں پر ہم کام کرنے کی کوشش کررہے ہیں۔ ایک ہفتے تک ہمارا کیمپ جاری رہے گا۔

انہوں نے کہا کہ بابر اعظم وکٹ کیپنگ کے آپشن میں شامل نہیں ہیں، بہت سی باتیں اس حوالے سے گردش میں ہیں، بابر اعظم بطور اوپنر ٹیم میں جگہ بنانے کیلئے کام کررہا ہے، فخر زمان اور صائم ایوب اوپنر کے آپشنز ہیں۔

(جاری ہے)

حسن علی سے متعلق گفتگو کرتے ہوئے انہوں نے کہا کہ حسن علی ویسٹ انڈیز میں ٹیم کے ساتھ ہوں گے، حسن علی بہت اچھی کرکٹ کھیل رہے ہیں، ریگولر فاسٹ بولرز کی غیر موجودگی میں ہم نے دیگر کو موقع دیا ہے، ایسے کھلاڑی کو زیادہ موقع دیا جائے گا جو انٹرنیشنل پلان پر پورا اترتے ہوں گے، سلمان مرزا کو حسن علی کی جگہ شامل کیا گیا ہے۔

ان کا کہنا تھا کہ شاہین شاہ آفریدی ورلڈ کلاس بولر ہیں، حارث روف انجری کی وجہ سے ہمارے ساتھ نہیں ہیں۔

ان کا یہ بھی کہنا تھا کہ کسی بلے باز کو یہ نہیں کہا کہ 150 کے اسٹرائیک ریٹ سے کھیلیں، اگر ہم ٹی 20 میں پیچھے ہیں اس کی وجہ ہماری بیٹنگ ہے ، مارڈرن ڈے کرکٹ میں آپ کو تیز کھیلنا ہوتا ہے۔