ایبٹ آباد، آبادی کے عالمی دن کے موقع پرمحکمہ بہبودآبادی کے زیر اہتمام سیمینار

جمعہ 11 جولائی 2025 15:52

ایبٹ آباد (اُردو پوائنٹ اخبارتازہ ترین - اے پی پی۔ 11 جولائی2025ء) آبادی کے عالمی دن کے موقع پرمحکمہ بہبود آبادی ضلع ایبٹ آبادکے زیر اہتمام سیمینار کا انعقاد کیا گیا۔سیمینار سے ڈسٹرکٹ پاپولیشن ویلفیئر آفیسر ایبٹ آباد سیف الرحمن، ڈپٹی ڈیموگرافر ایبٹ آبادنور محمد خان اور دیگر مقررین نے خطاب کیا۔ مقررین نے بڑھتی ہوئی آبادی اور وسائل کی کمی اور نوجوانوں کو اس اہم مسئلہ کے حوالے سے آگاہ کرنے اور انہیں معاشرے میں اپنا مثبت کردار ادا کرنے کی اہمیت پر زور دیا۔

(جاری ہے)

آبادی کاعالمی دن کو منانے کا مقصد تیزی سے بڑھتی ہوئی آبادی اور اس سے جڑے مسائل کے بارے میں لوگوں کو آگاہی دینا ہے کیونکہ آبادی کی شرح میں بے ہنگم اضافہ تعلیم اور معاشرے میں بنیادی سہولیات کے علاوہ صحت پر بھی اثر انداز ہوتا ہے ۔مقررین نے کہا کہ آئیں آج کے دن اس بات کا عہد کریں کہ محکمہ بہبود آبادی خیبر پختونخوا کا صحت مند معاشرہ تشکیل دینے کے مقصد کے حصول کے لیے بھر پور ساتھ اور ذمہ دار شہری ہونے کا ثبوت دیں گے اور مل کر پاکستان کوخوشحال بنانے کی جدو جہد میں اپنا بھرپور کردار ادا کریں گے۔