ح*پی اینڈ ڈی اجلاس، 12 ترقیاتی سکیموں کے لیے 19 ارب 88 کروڑ کے فنڈز منظور

ؒسیف سٹی منصوبے، آٹزم سکول اور زیرزمین پارکنگ سمیت نیلا گنبد، انارکلی و دیگر تاریخی علاقوں کی بحالی کیلئے فنڈز مختص

جمعہ 11 جولائی 2025 21:05

ؤلاہور (اُردو پوائنٹ اخبارتازہ ترین - آن لائن۔ 11 جولائی2025ء)پنجاب کی صوبائی ترقیاتی ورکنگ پارٹی کے رواں مالی سال کے پانچویں اجلاس میں 19 ارب 88 کروڑ روپے مالیت کی 12 ترقیاتی سکیموں کی منظوری دے دی گئی۔ اجلاس کی صدارت چیئرمین پی اینڈ ڈی بورڈ ڈاکٹر نعیم رؤف نے کی، جس میں مختلف سیکٹرز سے متعلق منصوبوں پر غور کیا گیا۔اجلاس میں گورنس، آئی ٹی، لوکل گورنمنٹ اور سپیشل ایجوکیشن کے شعبوں سے تعلق رکھنے والی سکیموں کی منظوری دی گئی۔

وزیراعلیٰ پنجاب سیف سٹی منصوبے کے تحت بہاولپور، ڈی جی خان، ملتان، لاہور، فیصل آباد، سرگودھا، گوجرانوالہ، گجرات اور راولپنڈی کے لیے 15 ارب 25 کروڑ روپے کے فنڈز مختص کیے گئے۔نیلا گنبد لاہور کی بحالی اور زیرزمین پارکنگ کی سہولت کے لیے 2 ارب 24 کروڑ روپے منظور کیے گئے۔

(جاری ہے)

نئی اور پرانی انارکلی، جین مندر، پان گلی، بادشاہی مارکیٹ اور بائبل سوسائٹی جیسے تاریخی علاقوں کی تزئین و آرائش اور بحالی کے لیے 1 ارب روپے مختص کیے گئے۔

خصوصی بچوں کی تعلیم کے فروغ کے لیے آٹزم سکول کے قیام کی سکیم کے لیے 1 ارب 38 کروڑ روپے کی منظوری دی گئی، جبکہ سیف سٹی ساہیوال کے لیے گاڑیوں کی خریداری کے لیے پوزیشن پیپر منظور کر لیا گیا۔اجلاس میں سیکرٹری پی اینڈ ڈی رفاقت علی، چیف اکانومسٹ مسعود انور، پی اینڈ ڈی بورڈ کے اراکین اور متعلقہ سیکٹرز کے افسران بھی شریک ہوئے۔