نوجوانوں میں تاریخی مقامات کی اہمیت اجاگر کرنا اولین ترجیح، ڈاکٹر احسان بھٹہ

لاہور (اُردو پوائنٹ اخبارتازہ ترین - اے پی پی۔ 13 جولائی2025ء) سیکرٹری پرائس کنٹرول اینڈ کموڈیٹیز مینجمنٹ ڈیپارٹمنٹ پنجاب ڈاکٹر احسان بھٹہ نے کہا ہے کہ نوجوان نسل میں تاریخی مقامات کی اہمیت کو اجاگر کرنا اولین ترجیح ہے۔ ان خیالات کا اظہار انہوں نے سول سروسز اکیڈمی کے 45 رکنی وفد کا پونچھ ہائوس اور سر شادی لال بلڈنگ لٹن روڈ کے دورہ کے موقع پر کیا۔

ڈاکٹر احسان بھٹہ نے وفد کو بریفنگ دیتے ہوئے بتایا کہ تاریخی عمارتوں کی بحالی سے ہم نوجوانوں میں ورثے کی قدر کرنے اور ان کی حفاظت کرنے کی ترغیب دے سکتے ہیں۔ انہوں نے کہا کہ نمائشوں، گائیڈڈ ٹورز، تعلیمی پروگراموں اور کمیونٹی کی شمولیت کے ذریعے نوجوانوں میں تاریخی ورثہ کی حفاظت کی ذمہ داری کے احساس کو فروغ دے سکتا ہے۔

(جاری ہے)

ڈاکٹر احسان بھٹہ نے برطانوی دور میں تعمیر ہونیوالی لاہور کی پہلی عمارت میں سردار بھگت سنگھ لائبریری کے متعلق بھی بتایا۔

تاریخی واقعات کی نقول کرتے مجسمے اور تصاویر وفد ارکان کی توجہ کا مرکز رہا۔ انہوں نے بتایا کہ غازی علم دین شہید گیلری، نبی آخرالزمانِﷺ سے محبت کیلئے بہترین خراج تحسین ہے۔ بھگت سنگھ اور سر شادی لال گیلریز کی تعمیر بین المذاہب ہم آہنگی کے فروغ کا باعث بنی ہیں۔ انہوں نے وفد کو بتایا کہ سکھ اور ہندو مذہب کے افراد محکمہ ٹورازم کے تعاون سے تاریخی عمارات کو دیکھنے آتے ہیں۔

ثقافتی فن تعمیر کی بحالی میں 90 فی صد سے زائد پرانے میٹریل کا استعمال کیا گیا ہے۔ رنگین شیشوں اور دیودار لکڑی سے مزین عمارات انگریز ، سکھ اور مغلیہ دور حکومت کی ثقافت کا عکاس ہیں۔ تاریخی مواد کی فراہمی اور دیگر امور میں لاہور ہائیکورٹ ،محکمہ آرکیالوجی، آرکائیوز اور سی اینڈ ڈبلیو کا بھی تعاون شامل ہے۔ وفد نے سر شادی لال اور غازی علم دین شہید لائبریری لٹن روڈ کا بھی دورہ کیا۔

وفد ارکان نے برصغیر کے ہیروز کو شاندار خراج عقیدت پیش کرنے پر حکومت پنجاب کے اقدامات کو سراہا۔ ایسی عمارتیں اور ہیروز کی تاریخ سے متعلق آنیوالی نسل کو آگاہ کرنے کیلئے تدریسی نظام میں شامل کرنا ضروری ہے۔ وفد ارکان نے تاثراتی کتاب میں اپنے تاثرات بھی قلمبند کیے۔ سپیشل سیکرٹری محکمہ صنعت نوشین ملک نے پونچھ ہاس میں وفد کو گلدستہ پیش کیا۔ کنسلٹنٹ ملک مقصود احمد اور محمد حسن نے بھی وفد کو ان عمارتوں کی تاریخ بارے آگاہ کیا۔ اس موقع پر ایکسییئن سی اینڈ ڈبلیو بھی موجود تھے۔