سیپرا کا قیام 100 یونٹ تک مفت بجلی فراہم کرنے والے منصوبے کی جانب پہلا قدم ہے،سید ناصر شاہ

سیپرا کے تحت جو بجلی سندھ حکومت پیدا کرے گی اس کا ٹیرف ہم مقرر کریں گے،وزیر توانائی سندھ کی خصوصی بات چیت

پیر 14 جولائی 2025 17:12

سیپرا کا قیام 100 یونٹ تک مفت بجلی فراہم کرنے والے منصوبے کی جانب پہلا ..

کراچی (اُردو پوائنٹ اخبارتازہ ترین - این این آئی۔ 14 جولائی2025ء)وزیر توانائی سندھ ناصر حسین شاہ نے 100 یونٹ تک مفت بجلی فراہم کرنے کے حوالے سے صارفین کو بڑی خوشخبری سنادی۔تفصیلات کے مطابق وزیر توانائی سندھ ناصر حسین شاہ نے خصوصی گفتگو میں کہا کہ سیپرا کا قیام 100 یونٹ تک مفت بجلی فراہم کرنے والے منصوبے کی جانب پہلا قدم ہے، سیپرا کے تحت جو بجلی سندھ حکومت پیدا کرے گی اس کا ٹیرف ہم مقرر کریں گے۔

وزیر توانائی سندھ نے بتایا کہ عوام کو سستی بجلی فراہم کرنے کیلئے سکھر اور لاڑکانہ میں سولر پارک لگائیں گے، حیسکو اور کے الیکٹرک کو سندھ حکومت کے سولر پارک سے بجلی فراہم ہورہی ہے، سکھر اور لاڑکانہ کے سولر پارکس سے سیپکو کو بجلی فراہم کی جائے گی۔ان کا کہنا تھا کہ سیپکو اور حیسکو بورڈ میں سندھ حکومت کے لوگ شامل ہیں لیکن کے الیکٹرک کے بورڈ میں سندھ حکومت کا نمائندہ شامل نہیں ، او جی ڈی سی ایل کے بورڈ میں وفاق کا نمائندہ ہے صوبائی حکومت کا نہیں، او جی ڈی ایس ایل میں سندھ کا نمائندہ شامل ہونا چاہیے۔

(جاری ہے)

صدر مملکت سے ملاقات کے حوالے سے صوبائی وزیر نے کہا کہ صدر آصف زرداری سے سندھ کے اہم معاملات پربات ہوئی، مخصوص نشستیں سے متعلق فیصلے کے بعد شوشے چھوڑے گئے، پہلے شوشہ چھوڑا گیا حکومت کی مدت10سال ہوگی وہ ناکام ہوگیا۔ان کا مزید کہنا تھا کہ صدر کی تبدیلی کا شوشہ چھوڑا گیا،آصف زرداری اپنی مدت پوری کریں گے، ہم نے پرائم منسٹر ہاس کا رستہ بھی دیکھا ہوا ہے، اگر پریزیڈنٹ ہاس چھوڑیں گے تو پرائم منسٹر ہاس جائیں گے۔