ٴغیر قانونی بھرتی کیس‘ پی اے آر سی کے چیئرمین سمیت 2ملزمان 3دن کے ریمانڈ پر ایف آئی اے کے حوالے

پیر 14 جولائی 2025 20:40

$اسلام آباد(اُردو پوائنٹ اخبارتازہ ترین - آن لائن۔ 14 جولائی2025ء)ایف آئی اے نے پاکستان ایگریکلچر ریسرچ کونسل کے چیئرمین صدارتی ایوارڈ یافتہ سائنسدان ڈاکٹر غلام محمد علی کو عدالت میں پیش کردیا۔ڈسٹرکٹ اینڈ سیشن کورٹس اسلام آباد میں ڈاکٹر غلام علی کو جوڈیشل مجسٹریٹ احمد شہزاد گوندل کی عدالت میں پیش کیا گیا، عدالت نے ملزمان کو 3 دن کے جسمانی ریمانڈ پر ایف آئی اے کے حوالے کردیا، ایف آئی اے کی جانب سے ملزمان کے 7 دن کے جسمانی ریمانڈ کی استدعا کی گئی تھی۔

پراسیکیوٹر نے کہا کہ چیئرمین پی اے آر سی کو غیرقانونی بھرتیوں اور اختیارات کے ناجائز استعمال کے الزام میں گرفتار کیا گیا ہے، ایف آئی اے نے اس معاملہ میں ملوث ڈائریکٹر اسٹیبلشمنٹ اخلاق ملک کو بھی گرفتار کیا ہے، چیئرمین پی اے آر سی نے 164 منظور شدہ آسامیوں پر 332 افراد غیر قانونی طریقہ سے بھرتی کیے ہیں۔

(جاری ہے)

عدالت کو پراسیکیوٹر نے مزید بتایا کہ ایف آئی اے اس معاملے پر ابھی مزید تحقیقات کررہی ہے۔

ایف آئی اے کے مطابق پی اے آر سی کے چیئرمین ڈاکٹر غلام محمد علی سمیت 19 افسروں کے خلاف ایف آئی اے نے مقدمہ درج کر رکھا ہے، غیر قانونی بھرتیوں کے لیے مبینہ رشوت لینے کے الزامات بھی ہیں۔ چیئرمین پی اے آر سی نے مقف اپنایا کہ تمام آسامیوں کا اشتہار دیا گیا تھا، تمام بھرتیوں کی سلیکشن کیلئے کمیٹیاں بنائی گئی تھیں، اس پر جج احمد شہزاد گوندل نے کہا کہ ابھی اس معاملے پر تحقیقات ہونی ہیں، چیزیں سامنے آئیں گی۔واضح رہے کہ پبلک اکانٹس کمیٹی نے پاکستان ایگریکلچرل ریسرچ کونسل کا معاملہ ایف آئی اے کے سپرد کیا تھا۔